Garbo ug hagit

Kumusta na kaha ang dagan sa trapiko sa south nga bahin sa dakbayan sa Sugbo, iIabina sa Mambaling area. Unsa na kaha ang sitwasyon niini usa ka semana human nga gibalik ni Cebu City Mayor Tomas Osmeña sa pag-deploy sa mga traffic enforcer didto taliwala niining kasungian niya ug sa hepe sa Land Transportation Office sa Central Visayas.

Base sa mga taho, maayo na kuno ang bul-og sa mga sakyanan tungod sa pagdumala sa mga sakop sa Cebu City Traffic Management Office. Apan adunay higayon nga mograbe ang paghuot sa mga sakyanan ilabina sa rush hour.

Human sa usa ka adlaw, maayo na lamang nga gibalik ni Osmeña ang mga traffic enforcers didto sa Mambaling, ilabina sa lugar diin kamulo pa ang konstruksiyon sa underpass project sa usa ka porsiyon sa Natalio Bacalso Avenue.

Kay kon wala pa ang mga traffic enforcer, siguradong magkamuritsing gayud ang kamada sa maong lugar. Kini sa dihang wala gayud mikubit ang LTO sa dakong hagit sa mayor nga maoy modumala sa trapiko sa maong lugar.

Nauyog man gud ang kinailadman ni Osmeña sa birada ni LTO regional director Caindec nga palpak ang iyang pagdumala sa trapiko sa Mambaling. Ug tulin kaayo nga nakahagit ang mayor ni Caindec nga ang LTO-7 mao na lamang ang mobantay sa trapiko sa Mambaling ug sa uban pang lugar sa dakbayan diin adunay seryosong problema sa trapiko.

Sipyat si Osmeña sa iyang hagit ni Caindec. Akong nasabtan nga mat-an pa usab sa pinya kining maong hepe sa LTO-7. Hinuon, kon buot hunahunaon, kargo sa local government unit, ilabina sa mayor, ang pagdumala sa trapiko sa usa ka lugar.

Klaro nga natandog ang garbo sa mayor sa pahit sa pangulo sa LTO-7. Kay kon wala niya gibalik ang mga traffic enforcer sa Mambaling taliwala sa iyang kasungian ni Caindec, ang katawhan sa south maoy dakong maalaot.

Ug delikado usab nga hapsan unya og mga kaso ang mayor tungod sa pagbaliwala niya sa ka seryoso nga problema sa trapiko sa Mambaling kon padayon niyang giatras ang mga traffic enforcer didto.