EDITORYAL - Bag-ong Ombudsman

Nagkinahanglan ang buhatan sa Ombudsman og bag-ong lider karong gikatakda nang moretiro sa pwesto si  Ombudsman Conchita Carpio-Morales  sa Hulyo 26.

Ang Judicial and Bar Council maoy gitahasan sa balaod nga mopili sa mosunod nga Ombudsman. Ang Ombudsman mao ang dangpanan sa katawhan kon may reklamo batok sa kahiwian, pag-abusar sa mga naa sa gahom.

Ang ubang mga ahensiya sa gobiyerno gikinahanglan ang mga lider dili lamang ligdong ug matinud-anon sa serbisyo kondili may katakos gyud pamunoan ang maong ahensiya ug labaw sa tanan may pagtugot sa presidente.

Ang JBC aduna nay mga napiliang mga nominado pagka-Ombudsman. Sila mao si Supreme Court Associate Justice Samuel Martires, Office of the Ombudsman Special Prosecutor Edilberto Sandoval ug pribadong abogado nga si Atty. Felito Ramirez.

Ang ilang mga pangalan giduso na sa JBC ngadto kang Duterte ug siya nay mopili kon kang kinsa ihatag ang maong posisyon.

Kaning mga gipilian pulos adunay mga agi sa ilang tagsatagsa ka mga gihuptang posisyon, apan dili lang unta kini maoy himuong basehan aron sila pilion.

Ang Office of the Ombudsman sama sa Commission on Human Rights usa sa mga gipuntariya kaniadto sa mga pro-Duterte nga angay nga wagtangon tungod sa mga pasangil nga midapig kini sa mga batos sa nakalabay nga administrasyon.

Angay sigurong sabton sa katawhan nga bisan “neutral” ang maong ahensiya sa ilang tahas,  apan dili ikalimod nga ang mga labaw sa maong ahensiya pinili man sa pangulo sa nasud.

Tungod niini ang Ombudsman dili gyud kalikayan nga madudahan nga nanalipod  sila sa presidente ug sa mga kaalyado niini kon sila ugaling makiha.

Apan dili kini maoy importante. Bahala pa og kinsa ang molingkod basta  paspas lang moresolbar ug modesisyon sa mga kaso nga moabot sa ilang buhatan.

Ang Ombudsman usa man sa mga dangpanan sa mga yanong katawhan nga dunay reklamo batok sa kurapsyon, abuso ug pagpabadlong sa pipila ka mga opisyales o kawani sa gobiyerno.