Kadaogan ni Manny dili kaayo impresibo

Kahibulongan. Sa away nilang Senador Manny Pacquiao ug Lucas Matthysse, didto pa ko makakita nga pagka-knock down sa kontra ni Manny sa sayong rawon (Round 3). Mora’g kulang sa kadasig si Lucas nga mosulong aron makabawi sa puntos nga nawala. Ngano kaha? Wala kahay script nga iyang gisunod?

Sa naghinapos nga segundos sa round 5, naigo tuod ni Manny ang nawong ni Lucas, pero daw slomo, wala dayon makita ang epekto. Mipitik pa ang pipila ka gutling, diha pa mikalit pagluhod si Matthysse nga kunohay nagtutok sa wala samtang giiphan sa repere.

Dihang nagharong sila’g usab, mibagting ang kampanilya. Mibalik si Lucas sa iyang korner nga wala gyuy bukol nga mihuboy sa iyang kaapingan. Dili baya solid punch ang milanding sa apapangig ni Lucas, pero napukling gihapon siya. Nakakita gyud kaha siya’g aninipot?

Ang ikapitong rawon maoy nakapakunot pag-ayo sa akong agtang. Tinuoray, daghang kumo ni Manny nga mikastigo gikan sa tiyan ngadto sa nawong ni Lucas, kinsa bisa’g lig-on pa tan-awon, mora’g nagpanagana nga moasdang aron makabawos.

Makita nga si Manny maoy agresibo nga magsige’g dasdas ngadtong Lucas ug daw giduladulaan lang niya ang Argentinian, kinsa mora’g dili maoy defending champion nga makigkombati, kinsa angay unta, mobanat taman sa ginhawa aron pagpanalipod nga ang bakos sa kabantog nga iyang nahuptan dili mailog sa iyang kaparang.

Apan naunsa, ba uy, nga sa tungatungang bahin sa Round 7, human sa pagsinukliay’g kinumo ngadtong Manny, si Lucas nga sa akong obserbasyon, wala gyud magroge ug mobarag, samtang nagbarug, mikalit man lang og kalusno, diin samtang giiphan sa repere aron kahatagan og higayon sa pagdesider kon mopadayon ba sa pagpakigpayit ni Manny o dili, giluwa man hinuon sa batan-ong boxer ang iyang mouthpiece timaan sa pagsurender!

Misiyagit sa tumang kalipay ang Pilipinas dihang gideklarar nga si Manny mao na ang bag-ong kampeyon sa WBA welterweight division, apan alang nako, dili convincing, kay ang mga knock out punches ni Manny nga pirme natong nasaksihan sa iyang mga away kaniadto, dili na mao ang matang sa knockout punches nga atong nakita karon. Busa, ang iyang kadaogan, dili kaayo impresibo.