Maayong balita gikan sa SSS

Kadaghanan natong mga senior citizen, mga SSS pensioner, ug kadaghanan nato ang atong gisaligan mao na lang ang pension gikan sa SSS, ug atong ma-imagine unsay mahimo sa binuwan nga P1,500 o P2,000 nga pension aron maseguro nga makakaon kita katulo sa usa ka adlaw.

Maayo man gani nga kita dinhi sa dakbayan sa Sugbo, adunay additional nga P1,000 matag buwan nga financial assistance gikan sa City Hall. Of course, ang P1,000 nga dugang pension nakapagaan sa gipas-an natong mga suliran.

Wala kita masayod kanus-a mahatag ang balanse nga P1,000 gikan sa gisaad nga P2,000 dugang pension.

Hinumdoman nga misupak ang taga-SSS sa P2,000 nga dugang pension gumikan sa kahadlok nga mabangkarota ang SSS. Maayo man gani nga gumikan sa pag-insister ni Presidente Digong Duterte gihatag kanato ang partial nga P1,000.

Sa kabalaka nga mahutdan sa pundo ang SSS, gisugyot nga usbawan ang contribution sa mga empleyado, apan gumikan sa daghang mga misupak niini, wala madayon kining maong laraw. Ug sa tinguha nga dili gayud mahutdan sa kuwarta ang SSS ug kalugwayan sa taas-taas nga panahon ang kinabuhi niini, ang SSS mi-invest og P3 bilyones gikan sa iyang reserve funds ngadto sa tulo ka reputable ug stable nga kompaniya sa mutual fund.

Ang inila ug kasaligan nga mga mutual fund company mao ang Sun Life of Canada Prosperity Balanced Fund Inc., BPI Philippine Stock Index Fund Inc. ug ang Philequity Fund Inc.

So, nindot  kaayo ni nga development, nagpasabot og dugang ug dako kaayo nga income sa SSS. Gipanghinaot nga magbungahon gayud ang maong investments , ug gisugyot nga kon mag-hire man og mga fund managers ug mga consultants, limitihan ang gidaghanon niini  ug dili kaayo patas-an ang ilang mga sweldo, o mga allowances.

Kini aron ma-maximize gayud kon unsa man ang mga earnings unya nga atong maani gikan sa P3 bilyones nga investment. Dako kaayo kini nga kwarta. Kwarta gikan sa katawhan. Kining mga mutual fund firms, aduna kini silay kaugalingon, o in-house nga mga fund managers nga maoy mo-oversee ug manalipod sa mga investments nga mosulod sa ilang kompaniya.

Busa, sa habig sa SSS, dili kinahanglan nga mag-hire sila’g daghang consultant, o mga fund managers nga manalipod sa investment niini. In most instances ra ba, dagko kaayo ni sila’g sweldo ug mga allowances, pakapinan pa’g daghang benepisyo, kining gitawag nga mga perks & privileges. Tingali hinoon nga sila ra ang makapahimulos sa income unya sa investments.