Kontak sa drugas naa sa prisohan

Unsaon man sa pagsanta sa ilegal nga drugas kon mismo ang anaa na sulod sa bilangoan ang nagpadagan niini?

Gibutyag ni Senior Superintendent Rommel Cabagnot nga ang mga notadong drug personality nga anaa sa city jail mao man ang nagsilbeng middlemen sa drugas gamit ang ilang cellphone.

Ang mga drug traders sa gawas, moagi sa ilang transaksyon pinaagi sa cellphone ngadto sa mga inmates sa Lapu-Lapu City Jail, kinsa mao usab ang momando sa ilang kontak didto sa Cebu City aron makakuha og supply sa drugas.

Nakuha sa police official ang information gikan sa mga new player sa drugas nga ilang nadakpan. Dili na kini bag-o kay mao na man kini ang nahitabo sa mga jail facility sa nasud.

Gani mismo si Mayor Paz Radaza nakapangutana nganong walay masakpan nga drugas, o kontrabando sa higayon nga adunay greyhound operation, “kay ngano kaha?”

Mao kini ang dakong hagit sa mga otoridad unsaon nila pagsumpo sa problema nga bisan gani ang mga napriso na, nagpadayon gihapon sa ilang negosyo.

Mao bitaw nga dili katuohan kining mga barangay sa lalawigan sa Sugbo nga gideklarar nga drug free kay ang bilanggoan gani nga gwardiyado kaayo, naa man ang tinonto, samot na nga mokuyanap ang drugas sa dapit nga libre ang tanan nga mosulod-gawas

Dili man hingpit masumpo, apan mamenosan pinaagi sa subsob nga kampanya sa kapolisan batok sa illegal drugs.

Dako ang papel sa komunidad nga maoy motaho sa kapolisan sa ilegal nga kalihokan sa ilang dapit, apan hangtud karon nagpasulabi gihapon ang  kahadlok ug ang walay pagpakabana nga mangambot lang sa panghitabo nga ilang nasayran.