EDITORYAL - Nakaamgo si Mayor Osmeña

Ang editoryal sa Banat News kagahapon, mitataw gyud nga dili makiangayon ang gihimo ni Mayor Tomas Osmeña nga gipabiyaan niya sa mga traffic enforcers sa CITOM ang kadalanan sa Mambaling nga nakasinati og problema sa trapiko tungod lang sa away nila ni LTO-7 Regional Director Victor Caindec.

Mapasalamaton kaayo ang katawhan nga nausab ang baruganan ni Mayor Osmeña ug gipabalik niya ang mga traffic enforcers sa CITOM aron maiban-ibanan ang problema sa trapiko sa Mambaling tungod sa nagpadayong pagmugna og tunnel project sa eskina Natalio Bacalso Avenue ug F. Llamas Street.

Dili gyud angay’ng sakripisyuhon ang mga sumasakay ug mga motorista, tungod lang kay nag-away ang mayor ug si Caindec. Nakasabot ang katawhan nganong walay maayong tinagdan si Osmeña kang Caindec kay rekomendado man kini sa kontra sa mayor nga mao si Presidential Assistant for Visayas Mike Dino.

Kinahanglang ihiklin nila ni Osmeña ug Dino ang personal nga kabangian, ug ipatigbabaw ang pagpangita’g paagi nga makahatag sila sa tininuod nga serbisyo ngadto sa katawhan. Ang wala magustohi ni Osmeña kay ang LTO ubos sa pagdumala ni Caindec dugay kaayong makarehistro sa mga bag-ong pinalit nga sakyanan.

Tungod niini, mibawos usab si Caindec pinaagi sa pagbadlong ni Osmeña nga dili manghilabot sa kalihokan sa LTO ug ang atimanon niini mao ang nag-unang problema sa dakbayan, sama sa grabeng problema sa traffic, basura ug baha sa kadalanan kon mag-uwan.            

Kining maong mga problema nga ilang gipanghisgotan, pulos kini lehitimo nga problema nga angay nilang sulbaron. Sa habig ni Caindec, kinahanglang paspas ang pagpangrehistro ug pag-isyu sa mga driver’s license, ingon man ang pagpanakop sa mga masalaypong driver.

Si Osmeña usab kinahanglang seryuso nga mosulbad sa problema sa paglunop ug pagbaha dinhi sa dakbayan, pinaagi sa pagpalawom ug pagpalapad pagbalik sa kasapaan nga hangtud karon wala pa mahimo sa iyang administrasyon. Unya ang inabtik nga paghipos sa basura. Ang problema sa trapik masulbad kini, ilabi na kon magtinabangay sila ug ang LTO.