Kinsa ni si ‘Office of the President?’

Tawo ba ni, o opisina lang? Ug kon opisina lang, kinsa man sa Office of the President ang nag-endorse, o nagpugos kang Kapitan Niña Mabatid pagpalansar pagka-presidente sa ABC? Mao ba ni ang hinungdan pagsibog ni Kapitan Phillip Zafra gikan sa ABC presidential race?

Tingali dili kini maoy hinungdan nga pagsibog niya ang iyang kandidatora pagka-ABC president kay matud niya: “I am declaring myself independent from any political group,” nga sa ato pa, dili na siya Team Rama, dili sab PDP-Laban, kay after all, matud niya: “under the Local Government Code a barangay captain is apolitical.”

Correct ka Kap. Apan, nganong na-associated man ang mga kapitan sa barangay, either sa BOPK, o sa Team Rama? Ug karong bag-o sa Team Dino? Nagpasabot nga sa balaod, apolitical, apan sa practice subra pa sa pagka-political.

Anyway, congratulations Phillip sa imong pag-decide nga dili ka na mo toe-the-line kay sa gusto sa partido, ug dili, mao na ang imong agdon ug sundon, ang kabubut-on ug kaayohan sa katawhan, particularly this time, ang imong mga konstituwente sa Tisa.

Anyway, kining giingon nga ang Office of the President maoy nag-endorse ni Mabatid, nahibawo ba kaha si Presidente Digong Duterte niini? Lahi man gud kon ang iyang Office lang kay sa siya gyud mismo ang mohimo sa endorsement.

Ato ra kining masayran sa mosunod nga mga adlaw. Hapit na ra ba, ug alang sa mabuot nga mga kapitan sa barangay ning dakbayan, unsa man, ang Office of the President ba ang inyong agdon kinsa ang inyong pilion pagka-ABC president?

At least kining pagsibog ni Zafra gikan sa piliay pagka-ABC President, dili na ma-three-cornered fight, ug bugno na lang between the incumbent mayor and the endorsee of the Office of the President. Sa mga tambay pa: Let us to see.

* * *

Sa susamang kalamboan, mahitungod sa mid-term elections karong sunod tuig, giingon nga sila si Mayor Tom ug Vice Mayor Ed Labella, supak sa tinguha ni House Speaker Pantaleon Alvarez pag-uswag sa 2019 elections.

Kini bisan pa, nga silang duha maka-benefit unta niining mga laraw ni Alvarez nga ma-extended ang ilang gahum hangtud sa 2022. Hinoon, ang mga kaatbang ni Tommy mosupak usab niini tungod kay maoy ilang gusto nga mapalagpot si Tommy gikan sa City Hall karong sunod tuig, ug sila na ang mopuli.

Apan buot sila nga tumanon ang balaod, ug aron ilang ma-obtain ug maangkon ang bag-ong mandato sa katawhan.

On the other hand hinoon, I don’t think nga ang mga kaatbang ni Mayor Tom dili gustong mauswag ang eleksiyon kay gusto na silang mopuli sa City Hall. Dili na sila makahuwat sa 2022.

He, he, he.