Pontio Pilato sa kamatayon sa bata

Gikumot akong kasingkasing nga nagtan-aw sa kwatro anyos nga si Bladen Kyler Abatayo kinsa namatay sa barangay Ermita, Dakbayan sa Sugbo.

Naigo siya sa saag nga bala atol sa anti-drug operation sa mga operatiba sa Carbon Police Station niadtong nakalabay’ng semana.

Makita pa sa CCTV nga gisapnay siya sa usa ka pulis nga nagdagan aron madala ang bata ngadto sa hospital aron maluwas apan pakyas. Wala gyud intawon magdahom ang inosenteng biktima ug ang iyang pamilya mao na ba diay to ang kataposan sa iyang kinabuhi.

Anaa ra siya sulod sa ilang balay nagtoon intawon sa iyang leksyon sa eskwelahan apan unsaon man nilapos ang bala sa ilang bungbong ug didto nitugpa sa lawas sa bata.

Matud pa sa amahan ni Kyler nga nangayo kaniya og pasaylo ang pulis tungod sa nahitabo.

Apan dali ra man kaayo nabali ang hangin kay nagpaka Pontio Pilato naman ang mga otoridad kinsa nanghunaw nga maoy nakaigo sa bata. Gipahid nila sa mga suspek kuno sa ilang operasyon ang salaod dihang nakiglinayogay kanila ug sa kataposan nakaikyas pa gyud.

Pastilan kinsa man intawon inyong patuohon sa inyong mabaw nga sugilanon, bati ra kaayo ang pagkasulat sa script sa pulis. Kini lang  ang akong punto, nganong nakaingon ko nga namakak ang pulis, armado man sila, nakig linayogay pa kuno sa mga suspek, nan  nganong wala naman lang nila pusila? Gihulat pa nilang makaikyas?

Doble ang kasakit nga gibati sa pamilya sa bata kay sila pa ang namatyan, nanghunaw pa ang responsable sa krimen. Matud sa amahan nga basin mapasaylo pa niya ang pulis kon moangkon kini sa salaod kay wala man usab tuyoa. Misusi na ang NBI sa nahitabo sa bata human nagpakitabang ang pamilya, hinaut nga aduna kini padulngan alang sa hustisya sa bata.

Mahimo man nga makalusot ang aksidenteng nakapusil sa bata, bisan kapila pa siya manghunaw sama ni Pilato, apan ang langit na ang mosilot kaniya.

Dili nalang ko moingon nga maayo unta hasolon siya sa iyang tanlag, sanglit kining tawhana walay konsensya.

Manghinaut kita nga mogawas ang kamatuoran, kon tinuod nga ang drug suspect maoy nakaigo sa bata, kinahanglan dakpon nila sa daling panahon.