EDITORYAL - Maayo ba ang “No-El?”

Adunay mga magbabalaod nga nawili pag-ayo sa ilang posisyon karon ug ingon sa dili na gusto nga mokanaog sa pwesto, hangtud nga hingpit na nga mahimong pederal ang sistema sa panggobiyerno sa nasud. Kini human nga adunay mga magbabalaod, kasagaran kaalyado ni Presidente Duterte, nga nagsige og tagawtaw nga walay mahitabong eleksiyon sa sunod tuig.

Apan usa sa mga nagtukod mismo sa partido ni Duterte nga si kanhi senador Aquilino Pimentel Jr. kinsa sakop sa Consultative Committee (Concom) nga gitahasan paghimo sa tamdanan sa plano nga bag-ohon ang Konstitusyon, wala ganahi maminaw niining “No-El,” kun no election. Ang Partido Demokratikong Pilipino-Laban (PDP-Laban) ni Duterte usa sa mga nangusog niining pederalismo, ug hangtud karon padayon pa nga naa sila sa estado sa konsultasyon sa publiko. Kon kining mga kaalyado sa PDP-Laban magsige’g hisgot og “No-El,” nabalaka si Pimentel nga maapektohan unya ang gilihok nga federal system.

Apan lahi kaayo ang pagtan-aw sa beteranong sakop sa ilang partido nga si Pimentel. Husto siya ug iya gyud nga gisugyot nga ipadayon ang mid-term elections sa 2019. Sila si Senate President Vicente Sotto III ug House Speaker Pantaleon Alvarez parehong nangagpas nga posibleng walay mahitabong eleksiyon karong umaabot nga Mayo 2019, aron ilang matutokan pag-ayo ang draft sa federal constitution.

Apan kon tan-awon og maayo, kinsa may mabulahan pag-ayo kon pananglitan dili madayon ang eleksiyon? Unya kon pananglitan mapasar ang Federal Constitution, sa ato pa kining mga naglingkod karon, malugwayan pa og mas taas-taas nga termino? Ang demokrasya sa Pilipinas nakita sa nanglabay nga katuigan pinaagi sa pagpahigayon og eleksiyon aron mailisan sa katawhan ang mga walay pulos, abusado, garaon, kurakot ug mga immoral nga lider. Sa maong paagi, makatingog ang mga yanong Pilipino batok sa mga hiwi nga opisyal. Basin og nagtuo ang mga kapartido ni Duterte nga naglingkod sa katungdanan nga giganahan kanila ang katawhan ug nga bisan madugta sila sa ilang posisyon karon, dili lang manumbaling ang katawhan.