Tomas hadlok nilang Espina ug Mabatid

Duha ka tawo karon dinhi sa dakbayan sa Sugbo ang gikahadlokan ni Mayor Tomas Osmeña ug sa iyang mga alyado sa BOPK kay dili makuha ang mayoriya. Sila mao si Brigadier General Erik Miguel Espina ug Kapitan Niña Mabatid sa Barangay Mabolo.

Si Espina, anak ni kanhi Gobernador Rene Espina ug usa ka heneral sa Army Reserve Unit nga 1901st Infantry Brigade Ready Reserve, gi-appoint ni Presidente Duterte isip konsehal sa siyudad sa Sugbo hulip kang James Cuenco nga gi-dismiss sa Ombudsman.

Sa presscon, si Tomas miingon nga ilang kuwestiyonon ang appointment ni Espina. Si Konsehal Sisinio Andales mikuwestiyon sa appointment ni Espina diha mismo sa sesyon sa konseho.

Apan daling gipakgang ni Bise Mayor Edgardo Labella si Andales ug giingnan nga ang pagkuwestiyon sa pirma ni Presidente Duterte pag-appoint kang Espina, trabaho sa korte ug dili sa konseho.

Bitaw, ang desisyon sa Ombudsman nga nagtaktak kang Cuenco “final and executory” busa nabakante ang iyang puwesto sa konseho. Dili buot sa presidente nga adunay “vacuum” diha sa konseho, busa iyang gipirmahan ang appointment ni Espina.

Adunay estorya nga i-quo warranto nila sa BOPK si Espina. Sa Rules of Court, ang mopasaka sa quo warranto mao ang Solicitor General. Nagtuo diay ang BOPK nga si SolGen Jose Calida mo-quo warranto sa appointment ni Espina nga gipirmahan sa “boss” ni Calida nga si Duterte?

Ang presidente dili mopirma sa appointment kon wala mag-agi og subsob nga pagtuon sa iyang mga staff sa Malacañang. Laing gikahadlokan sa mayor nga si Kapitan Niña Mabatid maoy mosakbang sa manok sa BOPK nga si Kapitan Franklyn Ong sa Barangay Kasambagan sa pagka-presidente sa Association of Barangay Councils.

Si Ong adunay multi-million contracts sa kagamhanan sa siyudad sa Sugbo. Pananglit mahimong ABC president si Ong ug molingkod isip ex-officio member sa konseho, mag-atubang siya og kaso nga “conflict of interest.”

Busa adunay mga kapitan (bisan mga taga BOPK) nga naghunahuna karon sa pagsuporta kang Mabatid. Si Mabatid adunay igong salapi nga ikasukol kang Ong. Apan unsay nahitabo? Nabiktima si Niña sa smear job.

Hunyo 19 nga insidente sa Waterfront Hotel lobby nga naglambigit kang Niña ug sa guard ug staff na-rekord sa CCTV sa hotel unya migawas sa Facebook. Usa ka tinuod nga mismong tag-iya, mamugos sa staff pag-file sa kaso sa Ombudsman batok kang Niña? Mogawas ba diay ang CCTV sa Facebook kon wa’y interesado?

Unsa katinuod nga si Tomas ug ang mga Gatchalian suod? Na-blotter ang insidente sa barangay sa Lahug. Wala ba kaha ibalita sa kampo ni Mary Ann delos Santos ngadto kang Tomas ang insidente?