Pondo sa batas dapat tiyakin
GAANO man kaganda ang isang batas, wala itong silbi kung walang pondo sa implementasyon nito. Kamakailan ay may dalawang batas na pinagtibay ni Presidente Duterte na akda ni House Appropriations Committee chair, Rep. Karlo Nograles ng unang distrito ng Davao. Ang mga ito ay ang RA 11037 at RA 11039 o ang Masustansyang Pagkain para sa Batang Pilipino Act, at ang Electric Cooperatives Emergency and Resiliency Act.
Importante ang mga batas na ito dahil bahagi ng programa ng pamahalaan sa pagsugpo ng kahirapan at pagpapaunlad sa mga kanayunan. At komo si Nograles ang may akda ng dalawang batas, sinabi niya na ayaw niyang madiskarel ang implementasyon ng mga ito dahil lang sa kawalan ng pondo. Ilang beses na kasing nangyari ito sa mga nakaraang panahon. May batas nga, kapos naman sa pondo kaya ‘di maipatupad. Komo si Nograles din ang tagapangulo ng House Appropriations Committee, tinitiyak niya na pagsisikapan ng kanyang komite na siguruhing may pondo para sa dalawang batas. P5.3 bilyon ang inilaan sa Department of Education na may kasamang P3.4 bilyong pondo para sa supplemental feeding program ng Department of Social Welfare and Development.
Para naman sa RA 11039, pang-unang budget na P750 milyon ang inilaan na para sa taong ito. Anang Kongresista, ang mga dumarating na bagyo at ‘di inaasahang lindol ay madalas lumilikha ng malaking pinsala sa mga power lines. At kung hindi agad maibabalik ang kuryente, apektado ang takbo ng kalakalan at magdurusa ang ekonomiya.
Higit dito, ang kalusugan ng mga mamamayan sa mga apektadong lugar ay apektado rin kapag nagtagal na walang daloy ng kuryente. Ayon kay Nograles, malaking hamon ito para sa kanya ngunit naniniwala siyang maayos na maipatutupad ang dalawang batas. Huling termino na ito ni Nograles at aniya, gusto niyang matapos ang kanyang panunungkulan nang may malaking nagawa para sa bansa.
- Latest