Dakong kalbaryo sa Natalio Bacalso

Mahimong kalbaryo sa mga pasahero gikan sa habagatan ang bag-ong traffic scheme nga ipatuman sa Department of Public Works and Highways (DPWH-7) diha sa Natalio Bacalso Avenue.

Tak-opan ang northbound lane sa maong karsada tungod sa tulo ka bulan nga 4th phase sa kontrobersiyal nga underpass project.

Wala gyud untay kalbaryo kon wala lang ipamugos kining maong proyekto nga sa sinugdanan nakitang dili makasulbad sa trapiko sa maong lugar.

Ang maong underpass project wala unta mahinayon sa panahon ni Mike Rama kay nakita sa mga opisyal sa siyudad sa Sugbo nga mausik lamang ang sobra P600 milyones kon himuon ang underpass ug dili makasulbad sa suliran sa trapiko sa eskina Natalio Bacalso ug F. Llamas.

Unsaon pagsulbad nga ang karsada igo ra gyud gilunod sa ilawom? Sa ato pa, ang kahuot sa trapiko unya igo ra gyud gilunod sa ilawom. Kay kon flyover pa na, igo ra pud iitsa sa ibabaw ang trapiko.

Apan sa dihang nakadaog si Mayor Tomas Osmeña, iya kining gipamugos. Unsay giapas ni Tomas nganong gipamugos kining proyektoha? Ang naa sa inyong hunahuna pareho sa naa sa akong hunahuna karon.

Sumala sa mga tabi-tabi sa putohan nga nagamit ang komisyon niining proyektoha sa eleksiyon sa barangay.

Mao kini nakapait. Kitang mga motorista ug mga pasahero ang magpas-an sa krus apan adunay usa nga nagngisi nga naghikap sa bulsang miburot tungod sa proyektong nakaingon sa kalbaryo sa mga tawo apan nakatabang sa pamolitika.

Ang kaabin sa mayor nga labaw usab nga duklonon sa mga tawo mao ang kongresista sa habagatang distrito sa siyudad sa Sugbo.

Si Bebot Abellanosa wala gyuy nahimo sa kongreso, pero padayong nagtungkawo kay adunay mga proyektong makapalipay kaniya. Usa na kining underpass project nga kalbaryo kaayo sa mga tawo.

Apan ang mayor nagpursige na sa kontraktor ning proyektoha nga dalion sa paghuman. Target nila nga mahuman kini sa dili pa ang 2019.

Siyempre, dali-dalion ang maong underpass project kay mahimo man gyud kining dakong isyu sa 2019 nga eleksiyon.

Nangiyawat intawon si Tomas nga kon mahuman kini, makalimot na sa kalbaryong giagian ang mga tawo. Ug makapanagang siya kon labayon siya ning isyuha ini’g kampanya sa 2019 nga piniliay.

Kining direktor sa DPWH-7 nga si Ador Canlas nagkasinabot ug si Tomas ug Bebot. Dili ba pareho man kini silang mga “yellow” group sa Liberal Party?

Mao bitaw nga si Canlas gilabanan sa mga magbabalaod sa Liberal kay sila ra man ang magkasinabot.

Dili ba usab kaha tipik sa plano nilang Canlas ang paghatag og kalbaryo sa mga tawo aron masuko sila sa administrasyong Duterte?