Abogado nga propesyon risgo

Lawyers are liars kuno. Eksperto mangita’g paagi nga ang bulok puti, himoong itom, ug ang itom papution aron maoy modaog sa kaso. Tudloan nila ang akusadong kliyente kon unsaon pagpamakak aron maabsuwelto.

Sagad sa mga banggiitang abogado, kinsa namatud-an na nga larino kaayong manalipod sa iyang gilabanang kliyente, maoy duolon sa mga adunahang nakasala sa balaod sama sa pagpanglugos, pagpamatay, pagpayuhot og ilegal nga drugas ug uban pa.

Bisa’g unsa kadako ang isingil sa abogado, dili magpanuko pagbayad, kay dako ang ilang pagsalig nga sila gyud ang modaog.

Mao ni ang hinungdan nganong daghang kriminal ang wa mabalhug sa atob, kay abunda man sa kuwarta nga ibayad sa dekampanilyang  abogado kang kansang specialty mao ang paglaban-salbar sa mga daotang linalang when the price is right.

Ang pangutana, unsa kaha ang bation sa pobreng kihante, kinsa imbes maoy modaog sa kaso, mao pa ang napilde? Dili kaha siya makahunahuna sa pagpaminawos?

Sa iyang pagpanimalos, dili kaha niya apilon ang abogado, kinsa larinong mituis sa matuod aron masalipdan ang kaangayan sa grabeng pagpamakak? Usab, kon mapilde ang giakusahang adik-adik, dili kaha niya tipion ang attorney?

Ning atong panahon, pipila na ba ka bantogang abogado ang gipamatay kay ang gilabanan nilang mga kriminal, kinsa bisa’g nagtipun-og na ang dinagkong salaod, midaog lang gihapon?

Busa, angay isilsil sa alimpatakan, nga ang hulmigas nga mayatakan sa dagkong tiil, mobawos man gani og paak, unsa na kaha ang tawo nga may kasingkasing nga mobati og kasakit?

Bisa’g ang kinahaitang abogado, kinsa maoy dumadaog sa kaso sa mikiha (plaintiff) nga iyang gilabanan, ‘no way out’ sab. Labi na og dato kaayo ang kontra, unya inpluwensiyado pa gyud, ay, pastilan.

Pila na ba ka tarong nga manlalaban ang gisaka sa ilang balay ug gibirahan-patay sa mga nag-bonnet nga mamumuno? Kay ang mastermind of all evils dili gusto nga mapriso?

Ang among silingan, kinsa hawod sab unta nga abogado, dihang nakasulay’g ukab sa bibliya ug ubang relihiyosong basahon, hingpit nga mibiya sa iyang propesyon, uy!

Imbes manglaban, nagsige na lang og paambit ug panudlo sa mga Maayong Balita sa kaluwasan. Siya miangkon nga risgo gyud ang trabaho sa abogado. Tagsa ra’y mapunta sa langit.