Ang Pangulo’y para sa lahat
KAHIT anong relihiyon ang kinabibilangan mo, kapag ikaw ay naging Presidente ng bansa, ikaw ay “ama” ng lahat ng tao, ano man ang relihiyon nila. Kung Kristiyano ka at naging Pangulo, pinamumunuan mo ang mga Katoliko, Protestante, Muslim, Buddhist at iba pa, pati na ang mga hindi naniniwala sa Diyos. Hindi dapat magkaroon ng bias at diskriminasyon.
Dahil dito, hindi marapat insultuhin ang ano mang relihiyon dahil tatamaan mo pati yung mga kasapi nito na dapat mong pagsilbihan bilang leader. Sensitibo palibhasa ang usapin sa relihiyon.
Kagaya na lamang ng ipinalabas na intelligence report na may sabwatan umano ang Simbahang Katoliko at ang Communist Party of the Philippines para patalsikin si Presidente Duterte. Ano ang magiging damdamin ng mga Katoliko na masugid na sumusuporta sa Pangulo dahil pati sila’y nakakaladkad sa sinasabing plano, totoo man ito o hindi.
Dahil dito, nilinaw ni Presidential Spokesman Harry Roque na ilang miyembro ng Simbahang Katolika lamang ang tinukoy na nakikipagsabwatan sa Communist Party of the Philippines-New People’s Army (CPP-NPA).
Hindi ko masisisi si Roque. Trabaho niya na mag-troubleshoot kapag nalalagay sa kontrobersyal na katayuan ang Pangulo. Ngunit ang ganitong mga impormasyon, totoo man o hindi ay dapat pag-isipan muna nang isandaang beses bago ilantad dahil may kaakibat na negatibong epekto sa magiging reaksyon ng mamamayan. Nahahati kasi ang bansa sa tuwing nagkakaroon ng mga pagtuligsa sa isang leader.
Katulad din niyan ng pagsasabi ng Pangulo na “estupido ang Diyos.” Kahit sabihin pang Diyos ng mga Katoliko ang pinatatamaan, lahat ng sektang Kristiyano ay bumatikos nang matindi sa Pangulo, bagay na sinagot naman ng mga supporters ng Pangulo na sa dakong huli’y nauwi sa palitan ng mga masasamang salita.
- Latest
