Boring nga drama

Gipahibalo ni Bise Mayor Edgardo Labella niadtong Sabado, Hunyo 30, ang iyang pagpapili sa pagka mayor sa Dakbayan sa Sugbo sa midterm election karong sunod tuig.

Apan sa wala pa mopahibalo si Labella sa iyang pagdagan sa pagka mayor, una na nga mipahibalo si kanhi mayor Mike Rama sa iyang pagpapili pag-usab batok ni Mayor Tomas Osmeña.

Si Mike Rama mao ang pangulo sa Barug Team Rama samtang si Bise Mayor Edgardo Labella mao ang pangulo sa PDP Laban dinhi sa dakbayan, ang partido ni Presidente Rodrigo Duterte.

Ang mga sakop sa Barug Team Rama, mga sakop usab sa PDP Laban, busa nakasugat og dakong suliran ang managkaalyado nga lokal ug national nga partidong political dinhi sa dakbayan sa Sugbo.

Kini tungod sa hukom nila ni Rama ug Labella sa pagpapili sa pagka mayor batok kang Mayor Osmeña. Hinuon, ang duha ka pangulo sa partido pulos masaligon ug kumpiyansa nga usa lang gayud kanila ang moatbang batok ni Osmeña.

Ang kaguliyang sa Barug Team Rama-PDP Laban ug ang posibleng pagkasiak niini, gihulagway ni Osmeña nga boring kaayo nga drama. Ang mayor nagkanayon nga sa katapusan, si Rama ug Labella maghiusa ug mag-uban ra, aron ipasiatab nga nagpabiling tibuok ang ilang grupo.

Si Rama ug Labella nasayod nga dili gayud sila modaog batok kang Osmeña kon silang duha ang molansar pagka mayor. Nasayod sila nga moabot sa dunggan ang ngisi ni Osmeña kon dili sila maghiusa.

Ning higayona, manghinambid na lang unya si Osmeña nga magtan-aw ni Labella ug Rama nga pwerteng wadwad sa pagpangampanya batok kaniya, pero pilde ra gihapon inig gawas sa resulta sa eleksiyon.

Mao ni ang angay’ng huna-hunaon nilang Rama ug Labella.