Naglumpayat sa interes

Naglumpayat na si Mayor Tomas Osmeña nga makuha ang mayoriya sa konseho kon makadaog ang iyang manok sa pagka-presidente sa Association of Barangay Council nga maoy mahimong ex officio member sa konseho sa siyudad.

Gidiga dayon sa mayor ang iyang katuyoan nganong gusto niyang makuha ang mayoriya – pagpugos sa BRT bisan gagmay ang karsada sa siyudad ug ang P18 bilyones nga Kawit Island Project.

Sa kadaghan sa problema sa siyudad, gikan sa nagkagrabe nga krisis sa trapiko sa bisan asang lugar sa habagatan ug amihanang bahin sa siyudad ngadto sa baha ug basura, ang BRT ug Kawit Island Project ra gyud ang naa sa iyang hunahuna.

Tungod ba kay nagsilaksilak ang P18 bilyones nga gikan sa World Bank loan sa BRT ug ang iyang makomisyon sa P18 bilyones nga Kawit Island Project mao nga kini lamang ang iyang hikutahon?

Hangtod karon, wala gihapon makatubag ang mayor unsaon paglampos sa BRT dinhi sa Sugbo nga gagmay man kaayo og mga karsada, ilabi na sa mga lugar nga agian niini sama sa Escario ug gikan sa Ayala paingon sa Talamban.

Sa 26 kilometros nga daganan niining BRT project, pila ra man ka kilometro ang adunay sobra sa duha ka lanes matag direksiyon?

Apan maayo na lang kay daling nakapasar og resolusyon ang konseho sa siyudad nga nagduso sa LRT subway sa dakbayan.

Uyon ko nga ibutang sa subway ang LRT sa dakbayan tungod kay gagmay na kaayo kita og karsada dinhi unya makapasamok kini og samot kon moilog pa sa lugar.

Misuway og supak ang mga konsehal sa BOPK. Siyempre, ila man nga gipamolitika kining transport issues sa siyudad pinaagi sa pagpamugos niini bisan gisupak ni kalihim Mike Dino.

Apan ang labing dakong bantayanan sa mga Sugboanon mao kining Kawit Island Project.

Kon paminawon nimo si Tomas, ganahan kaayo ka sa iyang estorya kay matud niya ang maong proyekto maghatag og singko mil ka mga trabaho.

Kining trabaho nga gipanghambog niya maisip nga asukar nga giputos sa tinud-anay niyang interes sa Kawit – kickback o commission.

Nindot paminawon apan wala na makahibalo ang naminaw nga alkanse na diay siya.

Pananglit madayon kining proyektoha, 10 porsiyento lang sa kita sa operasyon ang mapunta sa panudlanan sa siyudad ug unya pa kini magsugod sa ika-20 ka tuig sukad pagsugod.

Kun mouyon kita niini, dili ba maisip kining dakong tulis sa atubangan sa mga Sugboanon?

Hinuon, nagtuo ko nga adunay mabuot nga Sugboanon nga mopasaka og kaso kon idayon kini. Kinsa kadtong sakop sa konseho nga mopugos og uyon niini bisan “grossly disadvantageous” sa habig sa siyudad, seguradong mag-atubang og kaso, apil na nang SK federation president.