Kinsa si Dumpit ni Mayor Osmeña?

Nahingangha ang mga Sugboanon sa nasangpotan ni SPO1 Adonis Dumpit human siya mapatay sa mga operatiba sa National Bureau of Investigation ug kapolisan sa Bohol didto sa Tagbilaran City kaniadtong Miyerkules sa buntag. Walay nakatuo sa balita nga si Dumpit nalambigit na diay sa negosyo sa ilegal nga drugas didto sa Bohol.

Niadtong mga 2003-2005, sa dihang aktibo pa kaayo ko sa airsoft military simulation, si Dumpit pirme nga mokuyog namo didto sa bukirang barangay Toong. Siya ang tigpaypay sa sinugba namong baboy.

Sikat pa kaayo si Dumpit isip sakop sa SWAT sa Cebu City Police Office.

Nagkahigala kami ug ang tawag nako niya “idol,” ug tawgon usab ko niya og “idol.” Miligid ang mga tuig. Nakapusil-patay kang Ronron Go nga notado sa Villagonzalo. Nakonbikto ug napriso si Dumpit.

Apan ang kailado ni Dumpit naggumikan sa paggamit sa iyang ngalan pagpanghadlok sa mga daotang elemento isip tipik sa kampanya ni Mayor Tomas Osmeña batok kriminalidad. Gikopya sa mayor ang death squad sa Davao.

Kapin gatus ka personalidad ang natumba dinhi sa dakbayan sa “vigilante killing” nga matud sa mga estorya suportado sa mayor. Apan walay napamatud-an nga usa, duha, o daghan kanila, gitumba ni Dumpit.

Laing personalidad nga nakapasikat ni Dumpit mao ang iyang pagka-close in bodyguard ni Tomas.

Sa dihang midaog og balik si Tomas niadtong 2016, iyang gipaninguha nga makapiyansa si Dumpit. Si Tomas ang nagpakuha niya didto sa Abuyog Penal Colony sa Leyte.

Nakabalik si Dumpit isip bodyguard ni Tomas. Apan tungod sa mando sa bag-ong liderato sa PNP, nabalhin si Dumpit sa Bohol. Sumala sa balita, hangyo usab ni Dumpit nga sa Bohol lang siya magpalabay.

Nabalik siya sa Sugbo ug niadtong Pebrero sa miaging tuig, gituboy ni Tomas si Dumpit nga mahimong “caretaker” sa Barangay Ermita human masuspenso si anhing kapitan Imok Rupinta.

Apan ang wala nako mauyoni, sa dihang napatay na si Dumpit kagahapon sa operasyon sa NBI, daling nakadistansya ang mayor.

Matud ni Tomas sa pamahayag niya sa Facebook nga duha na ka tuig silang wala magkakita, bisan walay nangutana niya kanus-a ang katapusan nilang panagkita. Klaro nga namakak si Tomas. Pebrero 2017 (usa ka tuig ug upat ka buwan ang nakalabay), iyang gituboy si Dumpit nga mag-caretaker sa Ermita.

Nganong midistansiya man? Hadlok si Tomas nga maduhigan sa drugas?

Sa Facebook, dali nga nakabira ang oposisyon. Gi-post dayon ang balita nga si kanhi DOJ secretary Vit Aguirre mipaimbestigar kang Tomas tungod sa pasangil nga nakadawat og P7 milyones gikan kang Jaguar Diaz. Si Dumpit maoy gihimong panghadlok ni Tomas. Karon nga wala na, si Tomas na ba usab ang nahadlok?