Relihiyon walang kinalaman sa kahirapan
SA mga palitang-opinyon sa social media tungkol pa rin sa “stupid god” statement ni Presidente Duterte may mga umaayon sa ginawa niya. Kasi raw, kahit ang Pilipinas ay “Katolikong bansa” nananatili itong mahirap katulad nang maraming Catholic countries sa mundo. Batayan daw ito kaya itinuturing na “stupid” ng Pangulo ang Diyos.
Sa ganang akin, walang kinalaman ang Katolisismo o kahit anong relihiyon sa pag-unlad ng ekonomiya ng bansa dahil ang pagiging matuwid ng sino mang tao ay hindi nakasalalay sa alin mang relihiyon kundi sa wastong relasyon sa Panginoong Diyos. Ibig kong suriin natin ang situwasyon sa praktikal na anggulo.
Kung may wastong relasyon sa Diyos, wala nang korapsyon, gulangan at lamangan at magkakaroon ng kaayusan sa ating lipunan. Kahit ano man relihiyon ang sapian mo pero wala kang transpormasyon o pagbabago dulot ng tamang relasyon sa Diyos mananatili ang korapsyon na puno’t-dulo ng kahirapan.
Huwag magagalit ang tamaan pero may mga Katoliko, Protestante, Muslim at iba pa na kasapi ng ibang relihiyon ang corrupt to the bones. Kasi ang relihiyon nila ay isa lamang “tatak” na walang kabuluhan dahil hindi ipinamumuhay ang Aral ng Diyos.
Marahil, ang sasabihin ko’y palasak na kasabihang Kristiyano pero uulitin ko dahil pinaniniwalaan ko. Hindi relihiyon kundi relasyon sa Diyos ang tunay na makapagpapabago sa tao. Hindi natin kayang maging mabuti kahit magsikap tayo at tanging ang pagsisisi lamang natin at pagtanggap kay Kristo bilang Panginoon at Tagapagligtas ang magbibigay sa atin ng kakayahan upang maging matuwid at mabuti.
Wika nga ni Apostol Pablo sa Romans 7:14, hindi niya magawa ang mabuting dapat gawin at ang nagagawa niya ay yung masamang hindi dapat gawin dahil sa kanyang kalikasang makasalanan. Pero dugtong niya sa dakong huli ng pahayag, tanging si JesuCristo lang ang makapagliligtas sa kanya sa ganoong situwasyon.
- Latest