Hazing dili gyud mayo

Alang sa mapinanggaong ginikanan, ang anak usa ka bililhong gasa gikan sa langit. Wala lang kini patuloi og singot ibabaw sa kama, kon dili, gipangayo gyud nila kini sa Ginoo.

Dunay magtiayon nga sulod sa daghang katuigang paninguha nga makaanak, bisa’g unsa na lang eksibisyona ang ilang gihimo aron makaumol og bata, nalusno na lang ang kama nga ilang gihigdaan pirme, wala gyud sila makahulma.

Mao nga nagpalaban sila sa Ginoo. Misimba sila sa Redemptorist ug didto sa gamay’ng papel, gisulat ang ilang gipangayo sa atong Labaw’ng Magbubuhat uban sa pagpangayo og panabang ni Mama Mary nga unta hatagan na sila. Ug wa mahigawad ang kahugot sa ilang pagtuo kay nakabaton gyud sila og anak.

Kada bulan moadto sila’g ob-gyne aron ma-monitor pirme ang kahimtang sa nagtubong kinabuhi sa tagoangkan sa inahan. Wala nila igsapayan ang kamahal sa professional fee sa doktora ug sa mga tambal nga giresita para pagpalig-on sa bata, kay kalipay man nila ang pagsakripisyo sa ilang oras, salapi ug kahago alang sa kaayohan sa ilang liwat.

Sa tinuoray lang, grabe mopangga og anak ang ginikanan. Gikan sa gatas ngadto sa tanang panginahanglan niini matag adlaw, gihatag. Moskiteroan aron dili paakon og lamok. Isulod sa duyan, tabyogtabyogon ug kantahan hangtud makatulog.

Magkadako ang bata, magkataas sab ang kantidad nga magasto sa ginikanan. Samot, kon moeskuyla na ang anak. Gikan sa pre-school ngadto sa kolehiyo, ambot, kon pila ka milyon ka pesos ang magasto sa Papa ug Mama para mahatagan og dekalidad nga edukasyon ang gipanggang anak.

Apan sakit kaayong paminawon, nga ang anak pagka-college na, natental sa pagpamiyembro og fraternity, ug miagi’g grabeng hazing sa grupo, diin bisa’g kinsa lang ang mipulipuli’g bukbok ug bun-og sa lawas nga usahay mosangpot sa hinanaling kamatayon.

Pipila ba ka estudyante ang namatay tungod sa hazing? Nahatagan ba kini og hustisya? Nasilotan ba ang nakapatay? Unsay bation sa ginikanan, kinsa nag-antos pagmatuto sa anak gikan pa sa sabakan hangtud nga naulitawo, diin sa usa ka pagpamilok, gikutlo lang sa hazing ang kinabuhi?

Ang hazing dili gyud maayo. Angay’ng tutokan ug sumpoon kini sa kapolisan, ginikanan ug eskuylahan sa labing daling panahon aron wala na’y laing kinabuhi ang maalaot.