EDITORYAL - Internal cleansing sa PNP

Gipakita sa kadagkoan sa Philippine National Police (PNP) nga seryuso sila sa ilang internal cleansing nga gitumong aron wad-on ang mga badlungon nilang sakop. Pipila na ka mga polis nga nalambigit sa binuang, ilabi na sa ilegal nga drugas, ang nadakpan ug may napatay pa gani sa anti-illegal drugs operations.

Apan bisan pa man niini, may mga polis gihapon nga wala magmatngon, o gahi lang gyud kaayo’g ulo, kay nangyawat pa gyud hinungdan nga may pipila kanila nga nadakpan ug nag-atubang na karon og mga kaso nga kriminal ug administratiba. Sa pagpangampanya pa lang ni Presidente Duterte, gisaad na niya nga iyang padak-an ang suweldo sa mga polis ug kasundalohan.

Tuyo ni Duterte nga dili sila madala sa makatental nga suborno gikan sa mga ilegalista. Si PNP Chief Oscar Albayalde, ning bag-ohay lang, nipasidaan sa kapolisan nga kinahanglan silang motarong sa pagserbisyo karon nga gipadak-an na ang ilang sweldo ug gipamalitan sila og kagamitan ug sakyanan.

Apan mag-unsa ra man kining internal cleansing ug panawagan kon ang katawhan dili motabang paglimpyo sa kapolisan? Dunay mga polis nga nakahimo og salaod nga dili makasohan kay ang mga biktima malooy man, o kaha mahadlok nga panimaslan. Kini maoy rason kon ngano nga ang PNP maglisud gyud paghurot sa mga badlungon kay wa man sa’y moseryuso pagkiha kanila.

Hangtud nga dili mawala sa hunahuna sa kapolisan nga sila maoy hawod ug mas labaw kay sa katawhan nga ilang giserbisyohan, dili gyud mawagtang kining mga police scalawags. Kining pagpatambong og mga values formation programs ug retraining sa mga makasala nga kapolisan, makatabang kini dili para kanila, kon dili, hasta na pud sa katawhan kay makabaton sila og mga polis nga may pagtahod sa balaod ug sa katungod sa mga sibilyan.