2 ka saging kaonon kada adlaw (2)

Dinhi sa ato, kon mopalit kita og saging, pangitaon gyud ang saging nga hamis, o limpyo og panit. Apan balit-ad didto sa Japan, kay ang maot nga saging nga napuno sa tumton, o nagpuntik-puntik na sa mga itom, nga nalata na ang panit sa kahinog, maoy ilang ampay nga kaonon.

Nasayod sila, segun sa ilang pagtuon, nga ang saging nga ingon niini ang dagway, mas nagbaton og daghang prodyus nga TNF (Tumor Necrosis Factor), usa ka ‘cytokine’ nga moaway batok sa abnormal nga selyula sa tumor sa lawas, pinaagi sa pagpagana sa prodaksyon sa selyula sa puti nga dugo.

Sa ato pa, mas maayo kaonon ang saging nga medyo lata na sa pagkahinog ug tumtomon pa tan-awon, kay mas mopalig-on kini sa sistema sa imyun ug sa anti-kanser.

Ang nagpaluyong katarungan niini, mao nga walo ka beses nga mas epektibo kini alang sa puting selyula sa dugo kaysa green nga saging.

Ang nahimong pagdukiduki sa mga nagkahinog nga saging, nakonpirmar nga makapugong kini sa pagtubo ug pagkatap sa kanser. Busa imbes ilabay ang saging nga subra kahinog ug tumtomon ang panit, limpyohan kini ug lutoon.

Kaonon sab ni aron makakuha sab ug dasok nga mga nutrens, nga manalipod sa imong kahimsog, batok sa grabeng mga balatian.

Apan dili tanan sa saging nga makabenepisyo sa lamian pagkonsumo niini.

Aniay nasulayan na nga makapaalibyo sab sa mga gipamati nga kakulian sa panglawas.

* Kabuhi (heartburn) – isip pagkaon nga tugob sa alkalina, gamhanan ang saging sa daling alibyo sa kabuhi, gumikan sa pag-neutral sa nagtipun-og nga asido (acid influx).

Ang kanunay nga pagkaon sa saging, makahupay sa kutokuto nga gihasol sa kabuhi, nga pirme magsakit ug kasukaon.