Dugang proyekto gikinahanglan

Dako nga garbo natong tanan dinhi sa Sugbo ang pag-abli unya sa bag-o nga terminal sa Mactan Cebu International Airport. Sa katapusan, mabutang na sa mapa ang Sugbo isip usa sa adunay nindot ug bag-o nga airport sa kalibotan.

Pagsugod na unya sa operasyon sa Terminal 2 karong Hulyo 1, mosaka na usab ang gidaghanon sa mga international flights gikan ug padulong sa MCIA. Sa kinatibuk-an, gipaabot nga mosaka ngadto sa 11 milyones ang passenger traffic sa maong tugpahanan.

Nagpasabot lamang kini nga daghan na unya ang mga bisita nga mosuroy sa mga tourist destination sa lalawigan sa Sugbo tungod sa pagsaka sa local ug international flights. Ug dako kini nga grasya sa industriya sa turismo dinhi sa probinsiya.

Ang gipaabot sa tanan mao lamang ang pagtukod sa ikaduha nga runway diha sa maong tugpahanan. Kon matuman kini samot na ka daghan sa local ug international flights ang modagsa dinhi. Hinuon aprobado na ang maong proyekto.

Hinuon dili lamang ang Sugbo ang makabenepisyo sa pag-arangkada unya sa bag-ong terminal sa MCIA. Ang Sugbo maoy ganghaan sa Central Visayas ug kasilinganang rehiyon. Ug sayon na unya ang pagbisita sa mga turista sa maong mga lugar agi sa Sugbo.

Sa usa ka lugar, importante gayud ang accessibility niini. Ang pag-asenso niini maoy hinungdan usab sa paglambo sa turismo. Dili lamang kana, ang accessibility niini mohakot usab og mga negosyante tungod kay sayon na man unya ang pagbutang og puhonan.

Ug moresulta kini og dugang mga negosyo dinhi sa Sugbo tungod sa pagdagsa unya sa mga magpapatigayon. Gumikan niini, liboan usab ka trabaho ang mamugna diin daghang mga Sugboanon ang makabenepisyo.

Dili malalis nga nagkinahanglan gayud ang Sugbo og mga dagkong proyekto. Nunot sa nagkadako nga populasyon ug pagka-highly urbanized niini, dako pa ang panginahanglan sa Sugbo, ilabina sa Metro Cebu, sa mga infrastructure project.