Pagdunggo sa NFA rice
Tabang mo og bantay. Matinuod bang pasalig sa ekonomista nga mga sakop sa gabinete ni Presidente Rodrigo Duterte nga mous-os og P7 matag kilo ang presyo sa bugas humay sa kamerkadohan dinhi sa Sugbo ug ubang bahin sa Pilipinas inig abot na sa imported nga bugas humay gikan sa Thailand ug Vietnam.
Human sa pila ka semana nga kalangay, gitakdang modunggo na sa pantalan sa Dakbayan sa Sugbo ang unang hugna sa importasyon karong Miyerkules, Hunyo 20.
Nipasalig ang lokal nga mga opisyal sa National Food Authority (NFA) nga mabaligya nang baratong bugas humay sa kamerkadohan sa Sugbo, Bohol, Negros Oriental ug Siquijor karong Hulyo 1.
* * *
Palihug tabang og timaan pila ang presyo karon sa commercial rice sa imong suki nga palitanan.
Aron nga atong matandi tinuod ba gyong mous-os ang presyo sugod sa sunod buwan.
Sa usa ka bahin, niinsistir ang economic managers ni Presidente Duterte nga ang pagkawagtang sa NFA rice sa kamerkadohan, di ang aktuwal nga kanihit sa suplay, mao ang nakapaburot sa presyo sa commercial rice.
Apan sa pikas nga bahin, may abundang mga ebidensiya sa nangaging katuigan nga human nitaas ang presyo di lang sa bugas kon dili hasta sa ubang palaliton lisod na ning birahon pagbalik paubos.
* * *
Pila ka adlaw sa di pa modunggo ang 140,000 ka sakong NFA rice sa Cebu International Port (CIP), gisukwahi nang daan sa NFA ang pag-apura sa economic managers nga ibaligya dayon ang mas baratong bugas humay sa kamerkadohan.
Matod sa lokal nga kadagkoan sa NFA unahon pagtagbaw ang panginahanglan sa NFA rice sa Department of Social Welfare and Development (DSWD), National Disaster Risk Reduction and Management Office (NDRRMO) ug Local Government Units (LGUs) aron nga maatiman ang mga biktima sa katalagman ug ubang dinaliang panginahanglan.
* * *
Gipasalig hinuon sa NFA nga ang mas dakong shipment nga 18,000 ka tonelada o 360,000 ka sakong bugas humay mosunod sa pagdunggo sa CIP karong Agosto. Nianang higayona, makita na gyung katag:
• Kon motidlom ang presyo sa commercial rice tinuod gyod diay nga gipaburot lang sa mga negosyante ang ilang ginansiya; ug
• Kon di mous-os ang presyo mapamatud-ang nagpataka na sab ang economic managers ni Presidente Duterte.
* * *
- Latest
