Giunsa ko pag-agak ni Tatay

Kadtong akong Tatay Andot, wa katunob og hayskol.  Unsaon, anak man lang siya og usa ka single parent. Principal baya sa elementary school ang iyang amahan. Arroyo pa ra ba gyud ang apelyido.

Giila siya nga anak, pero subra kaigihan ang asawa sa principal nga si Nang Pepay. Mao nga kutob na lang intawon si Tatay sa siksto grado bisa’g gusto unta ni Arroyo nga patiwason og eskuyla ang iyang anak hangtud nga makahuman og kurso. Gipugnga’g maayo ni anhing Nang Pepay ang plano sa bana. Hinungdan, nga si Tatay nagtubo sa kaugalingon niyang paningkamot.

Luoy ang naagiang pagkabata ni Tatay, kay saka kanaogan lang siya sa iyang single mother, kinsa ingon sa walay paghigugma niya.

Isip anak og pinaangkan, gidaugdaog siya sa iyang mga kaliwat, duklon, sawayon ug sugosugoon daw ulipon. Iya ning giagwanta ang tanan, makakaon lang og gamay aron mabuhi.

Pipila lang kini ka eksena sa iyang kinabuhi nga nabasahan ko sa diary nga iyang gibilin namong mga anak sa dayon na niyang kamatay ug hangtud karon, gitipigan nako sa akong kasingkasing.

Naulitawo si Tatay nga maskulado og lawas, ubay-ubay’g nakamaohan sa pangamot. Mao nga dihang may bugoy nga mituwangtuwang sa lamesa sa iyang uyab nga naninda’g mani, sumbagon bitaw’ng Tatay, ay, napasok ilawom sa lantay ang hambogero, uy! Ang maong uyab, maoy naasawa ni Tatay ug maoy nahimo namong Nanay.

Kon unsa kapait ang naagian ni Tatay, wa gyud kini namo matagamtami nga mga anak. Bisan construction worker lang siya, makakaon gyud mi katulo usa ka adlaw. Ginamos ug buwad ra hinuon ang sagad namong sud-an.

Buotan si Tatay, kugihan ug mapinanggaon. Bisan kausa, wa gyud ko kakita nga iyang gipasakitan si Nanay. Siya ang nag-agak namo kon unsa katam-is puy-an ang kakabus.

Gikan sa duyan, pirme niyang ipabati namo ang kainit sa iyang palad nga nagmahal. Siya ang nagtudlo namo unsaon paglakaw, pagdagan, pagpanginhas, pagpangahoy, pagpangisda ug uban pa’ng pinobre nga kapanginabuhian.

Ang matang sa iyang pag-agak nahimong lig-ong hagdanan nga maoy akong gitikangan paingon sa unsay akong nahimutangan karon, ang dapit nga tuburan sa langitnong kalipay nga gipangandoy sa tanang adunahan nga maangkon, apan diri gihatag sa Ginoo kanako. Happy Father’s Day Tatay!