Kiss ni Duterte bisobiso lang

Nakita nako ang video ni Tatay Digong ug sa Pinay nga naminyog Koreano nga nag-kiss atubangan sa bagang duot nga OFWs, kinsa nanambong sa pagbisita-pagkigpulong niya sa South Korea.

Samtang naggunit  og libro, nangutana siya sa audience kon kinsay gustong makabaton og kopya. Ang ganahan, iyang giawhag sa pagsaka lang sa stage. Sa sinugdanan nag-ukon-ukon ang nanambong.

Unya, may usa ka ginang nga disedidong mosaka sa entablado apan naungot dihang misulti ang Pangulong Duterte nga nagkinahanglan siyag duha ka babaye ug gani, natudlo pa sa iyang baba kadtong  guwapang babayeng naglingkod sa atubangan nga nagsul-ob og puting blouse pinaresag itom nga sayal.

Sa didto na ang duha ka babaye sa stage aron pagdawat sa libro, giadbaysan ni Tatay Digong ang duha nga magpulipuli lag gamit niini. Total, mahuman ra man kinig basa og duha ka gabii.

Sa tumang kalipay nga gibati, gikuha sa duha ka babaye ang kamot ni Tatay Digong, diin wala lang sila molamano, kondili, mi-amen gyud.

Mao nga gikomedyahan sila,  “Ayag amen-amen kay may’g tigulang!  Biso-biso!”

Ang usa ka ginang nga nag-white and red maoy unang mibisobiso sa presidente. Ang laing usa naulahi. Aw, gisenyasan ni Tatay Digong nga puwede ba sila sa lips magbisobiso nga klaro kaayong nakapakilig sa Pinay nga Korean wife.

Sanglit dinhay kataha, gisukna  ang babaye ni Tatay Digong kon dalaga pa ba kini? Dihang mipahibalo nga minyo, gipangutana  kon naa ba sa crowd, diin daling nakatubag ang babaye nga wala. Dinhi, giklaro ni Tatay Digong nga kining ilang buhaton, tiawtiaw lang. Ug gisukna ang babaye kon okay ra ba niya?

Kay mitando ang babaye, aw, nag-abot ilang lips. Pero, wa mag-lips to lips! Busa, naglibog ko kon nganong gisaway sa taga Gabriela ug taga oposisyon ang gihimo ni Tatay Digong?

Di ba, nananghid siya ug nagsabot, diin ang babaye malipayon kaayong miuyon?

Para nako, may sagradong respeto ang maong panagbisobiso sa mga ngabil kay kini ilang nasabotan.

Busa, nabuhat atubangan sa audience without malice attached. Ug correction sa mga daotag hunahuna. Walay kiss nga nahitabo. Bisobiso o panag-abot lang sa mga ngabil ang nakita sa korap nga mga mata!