Nagtinga na gyud ang BRT project

Ang padayong pagbugalbugal ni Mayor Tomas Osmeña kang Department of Transportation Arthur Tugade makapasamot nga mapunta sa morgue ang Cebu Bus Rapid Transit (BRT) project. Imbes nga anaa pa unta kini sa ICU, dili na gyud hinuon kini matabang.

Nasuko ang mayor kang Tugade tungod sa kalangay sa pagpatuman sa P18 bilyones nga BRT. Nganong si Tugade man ang pasanginlan nga kaniadto pa man ning 2012 nagsugod og kalangay tungod kay ang BRT dili lagi haom dinhi sa Sugbo nga gagmay og mga karsada.

Mitiyabaw usab si Tomas nganong wala siya paapila sa meeting ni Tugade ug sa World Bank. Nganong moapil man siya nga dili man siya project owner? Ang DOTr man ang mopadagan niini, dili man ang siyudad.

Usa pa, kahibalo na ang World Bank nga delikado nga ikaestorya ang mayor nga moinsister sa iyang gusto bisan walay klaro.

Apan bisan unsaon tingali og pangugat sa mayor, mura og wala nay kaugmaon ang BRT kay klaro man sa iyang tubag sa pangutana sa reporter atol sa pagbukas sa Terminal 2 sa Mactan Cebu International Airport nga dili uyon si Pres. Rodrigo sa BRT.

Sa ato pa, kanang propaganda sa kampo sa mayor nga “Salamat Pres. Duterte sa BRT” wala diay magsilbi. Aw, kahibalo man sila nga dili madala og ilad-ilad ug ulog-ulog ang presidente. Unya, kahibalo usab siya nga proyekto na nga naaprobahan ni Noynoy Aquino sa 2014.

“Basket of solutions” ang gusto sa presidente alang sa suliran sa trapiko dinhi sa Metro Cebu. Mao usab kini ang gisugyot ni Tugade atol sa katapusang meeting sa NEDA ICC.

Ang presidente miklaro nga ang BRT maayo lang sa mga dagkong lugar. Pero sama sa Davao ug Cebu, rail ang angayan dinhi.

Ang mga proponent sa BRT misulay og ilad sa mga Sugboanon pinaagi sa pagpa-presscon unya miingon sila nga ang BRT dili angay itandi sa LRT ug ang BRT mahimong malampuson kon i-ban o i-limit ang mga pribadong sakyanan kay ang mga tawo pasakyon na lang og BRT.

Akong tubag niini: “maayo og matuman.” Sa inengles pa, “too good to be true.” Ang kotse ning mga panahona nahimo nang “necessity.” Tungod kini sa kapin 30 ka tuig nga palpak nga pamunoan nga wala han-aya ang masterplan alang sa land use ug transportation hinungdan sa nagkayagaw ang siyudad sa Sugbo.

Walay ganahan molakaw kay walay covered pedestrian walkway ang siyudad.

Grabe kainit sa panahon unya ang nahunahunaan sa mga proponent sa BRT palakwon lang ang mga tawo gikan sa terminal paingon sa ilang destinasyon.

Kay ang BRT dili makaliot pasulod sa San Nicolas, Pasil, Labangon, Mabolo, ug uban pa.