Purohan ni James

Kwestiyonable gyud ang pangangkon nga si LeBron James na ang labing maayo nga basketball player sa kalibotan. Kini ilabina sa diha nga gipakaging gayud sa Golden State Warriors si James ug ang Cleveland Cavaliers sa finals sa National Basketball Association.

Niining ulahi nga kapildihan ni James, daghan ang nagpanagana pagdeklara kaniya nga labing maayo sa kasaysayan sa basketball. Sa iyang career, tulo lamang ka kampeyonato ang nasungkit ni James: usa sa Cleveland ug duha uban sa Miami Heat.

Pagsugod pa lamang sa finals, daan na akong nakatimaho nga dehado gayud ang Cavaliers. Ikumpara sa Warriors nga puno sa mga maayo nga player, si James lamang ang mituboy sa Cavaliers. Kulang siya sa insakto nga katimbang.

Ang resulta, mora na hinuon og gimasaker ang Cavaliers sa finals. Upat ka sunodsunod ka dula nga gilampaso sila sa Warriors. Lupig sa hangin ang Cavaliers sa daghan nga superstar sa Golden State.

Aduna untay purohan ang Cleveland nga makadaug sa Game One. Apan napalpak ang diskarte ni J. R. Smith sa dihang iyang gigawas ang bola nga iyang na-rebound ug wala gideritso sa ring, hinungdan sa pagka-overtime sa dula.

Kung magpabilin nga intact ang Warriors, walay team ang makapildi kanila sa NBA. Bilib gayud ako ni Kevin Durant. Bisan asa siya mopuwesto, mogana gayud ang iyang pulso. Usa siya ka all-around player ug usa sa labing ngilngig sa NBA karon.

Alang kang James, dako ang posibilidad nga manamilit na usab siya sa Cleveland sa ikaduha ka higayon ug adto kini motugpa sa team nga adunay potensiyal nga mahimo nga contender alang sa kampeyonato.

Akoy gisayangan sa abilidad ni James. Dili ikalalis nga siya ang labing maayo nga NBA player karong panahona. Daghan na unta nga korona ang iyang nalangkat kon aduna lamang siyay katimbang, sama niadtong higayon nga didto pa siya sa Miami Heat.

Sa edad nga 33 anyos, hapit na ma-senior citizen si James sa NBA. Apan kay siya man ang hari sa liga karon, dako ang posibilidad nga mohakot pa kini og mga korona.