Santaon ang pagkahingaon

Nahimong kinaiya sa ubang tawo ang grabe nga pagkahingaon. Maglisud pagpugong nga kamenosan ang konsumo kay dili man matagbaw sa kabusog, kon dili, mobusdik pag-ayo ang ginhawaan. Mao nga sagad niresulta kini sa subra katambok, nga nagbusyad nga wala kapiog ang bilbil sa kadako sa tiyan.

Niining senaryo sa kondisyon sa lawas, indikasyon kini sa mga sagubangon nga mga sintomas sa nagkalainlaing gipamati nga problema sa panglawas. Sagad sa mga hingaon kaayo, dali ra kutasan, o gikapoy na bisan og mao pa’y paghuman og kaon.

Ang tambok nga kasingkasing, maglugos na makalahutay sa pagbomba sa gikinahanglang oxygen nga isuplay aron mogana nga molagsik ang lawas. Kon nakaamgo kita sa negatibo nga epekto sa atong pagkahingaon, kinahanglan nga atong usbon ang kinaiya nato sa pagkaon.

Malisud man, apan kon pursigido sa tumong sa pagpabalik sa kahimsog sa lawas, wala’y dili mahimo nga molampos ka kon imo gayud nga tinguhaon.

Ayaw lang pakaliti, anaron lang nga kada tingkaon anamon lang menos ang gikaon, kanang dili kaayo ang utok makamatngon nga kadugayan makaabot ka sa punto nga mahusto na ang sukdanan sa pagkaon nga makahimsog.

Unya, mag-anad na sab kita paghinayhinay sa pag-ehersisyo, nga maunat ang lawas aron mapagawas ang mga toksins nga nakadaot sa lawas.

Ang regular nga pag-ehersisyo, usa kini sa mga paagi pagsanta sa grabe nga pagkahingaon, kay mabadlong man ang lawas nga sa pag-unat niini, manggawas ang tambok nga wala na kinahanglana.

Busa sukli ang kakutas, kon kapoyan pahulay, basta kanunay mo lang nga ugtason ang lawas sa ehersisyo. Sagad ra ba kini nga sakit sa mga hingaon, dili ganahan mo-ehersisyo kay kapoy.