Trayanggulo ang porma sa kinabuhi

Ang kinabuhi sa tawo gidesinyo sa Ginoo nga porma og trayanggulo  (triangle). Una, ang walang bahin sa ubos mao ang atong pagkahimugso. Ikaduha, human sa pagkatawo, mosaka na sab kita padulong sa naghandag nga kinatumyan nga mao ang kaminyoon.

Pag-abot nato dinhi, dili na gyud ta makairog padulong sa itaas kay mao na’y mosunod ang pagpatighulog nato sa kinaubsang bahin nga mao ang atong katapusan.

Bitaw, mao gyud kini ang maagian natong tanan ning kalibutana: Birth, Marriage and Death. Sa atong pagkahimugso, dinhi magsugod ang atong pagpakabuhi sa kalibutan. Mao nga importante gyud sa mga ginikanan ang pagmatuto, pag-agak ug pagtudlo sa mga maayong buhat  ngadto sa anak aron pag-abot sa higayon nga siya ug ang kapares mao na pud ang hiusahon sa altar sa kaminyoon, may igo siya nga kalig-on sa pagpakig-away sa daghang pagsulay ning kinabuhi.

From birth to marriage nagkalandrakas lang ang sweet and sour experience nga maagian sa tawo, labi na pag-abot sa kaminyoon. Dinhi motungha ang krus nga giingon sa Ginoo. “Ang krus nga akong ihatag ninyo gaan. Sayon ra gyud kining pas-anon.” Pagka tulugkaron nga saad! Kay unsa ba’y Iyang ipasabot?

Nga ang kaminyoon mao ang gaan nga krus nga Iyang isangon sa magtiayon. Gaan ra kini kon ang magtiayon magtambayayong lang sa pag-alsa ning misyon nga Iyang gihatag.

Pero, kon ang krus binuhat gani sa tawo, mosugod na og pangabit si mister, unya si misis nanglaki sab, haska gyud nga bug-ata! Sagad gyud mosangko ngadto sa panagbulag.

The real beauty of marriage can only be experienced when both couples have these following characteristics: Honest, trust and respect which when all added will sum up to a Perfect Love, a kind of love that fully defines God’s commandment.

Ang marriage mao ang noontime sa atong kinabuhi. Mosugot ka’g dili, mopadulong na gyud ta sa kasadpan. Mao nga mangandam gyud! Kon kita bati og performance diha sa kaminyoon, atong paningkamotan nga kini manindot. Kinahanglang mopaduol ta sa Ginoo samtang may panahon pa sa pagbag-o kay mas maayo nga sugaton ta sa katahom sa kahaponon diha sa atong pagsalop.