Kakha tuka

Unsaon pag-ila sa mga kabus, o pobre sa atong nasud? Kadto ra ba nga mga tawo nga wala’y trabaho, o wala’y panginabuhi ang matawag nga kabus? O apil kadtong duna’y trabaho apan gamay ra ang sweldo?

Unsa man kagamay, o kadako sa sweldo ang maisip nga mahilakip sa hut-ong sa kabus? Kini ang daghan nga pangutana nga matubag pinaagi sa sitwasyon karon sa atong nasud, base sa kasinatian sa katawhan nga nagping-it na sa kalisdanan.

Apan kadtong mga adunahan nga nagyaka ug nagpahayahay lang sa airconditioned room, dili maka-relate, o makatubag niining maong pangutana. Labaw na gyud nga buta sa isyu sa mga kabus kining mga opisyal sa kagamhanan nga gibutang sa iyang pwesto bisan og wala’y kasinatian sa kabus nga katawhan.

Sama sa pamahayag nga giluwatan sa usa ka opisyal sa National Economic and Development Authority (NEDA) nga ang pamilya nga adunay lima ka miyembro ug mokita’g P10 mil kada bulan, dili kuno maisip nga kabus. Pastilan, giunsa man intawon kini sa pagtan-aw sa NEDA, partikular na ni Undersecretary Rosemarie Edillon?

Klaro gyud kaayo nga wala sila makasinati og kalisod sa pag-budget sa gamay’ng kantidad nga igo-igoon gyud aron makaagwanta ang mga miyembro sa kabus mga pamilya. Maayo ni nga ipanglabay ang mga opisyal sa NEDA pabalik sa dekada 50 kay seguradong mohaum gyud ang ilang giingon nga dili pobre kadtong nagsweldo og P10 mil ang buwan.

Karon, ang P10 mil, lamyon lang sa daghan nga galastohan, kuhaan pa daan sa mga utang. Wala na mabuhi ang mga trabahador sa sweldo, kon dili sa utang. Sama sa manok nga sige og kakha, aron lang makatuka ang mga tawo nga nagkalisod, ilabi na sa taas nga presyo sa palaliton.

Mas maayo nga sweldohan og P10 mil ang mga opisyal sa NEDA aron makasulay sila og lami kon unsaon sa pag-igo niining kwartaha. Tan-awon nato kon makaagwanta ba sila sa kinabuhi sa usa ka kakha tuka.