Duna ba’y separation pay kon ang kawani nga mo-resign ma-terminate?

Dear Atty. Divine,

Ang akong manghud gipasanginlan sa ilang kompaniya nga apil kuno sa anomaliya nga nahitabo sa ilang department.

Tungod niini, giingnan sila sa ilang HR nga paresaynon silang tanan nga gidudahan, apil na ang akong manghud, kay kon dili sila mo-resign, i-terminate sila sa company.

Ang akong manghud, 5 years na nga nagtrabaho sa iyang company. Ang akong pangutana kon may madawat ba ang akong manghud kon siya i-terminate, or kon siya mo-resign? Daghang salamat. — Loida

Dear Loida,

Base sa atong Labor Code, ang usa ka empleyado mahimo lang i-terminate sa employer base sa valid cause, or authorize causes.

Sa ato pa, ang usa ka empleyado mahimo lang mataktak sa trabaho kon siya mapamatud-an human sa imbestigasyon nga dunay dakong kalapasan nga nahimo, apan kinahanglan nga moagi og due process.

Sa kaso sa imong manghud, kon wa siya’y labot sa anomaliya, dili siya angay’ng mo-resign kay ang employer dili maka-terminate sa employee kon wa kini kalapasan nga nahimo. Kon mo-resign ang imong manghud, wa siya’y madawat nga separation pay kay boluntaryo man ang resignation.

Pananglit ma-terminate sab siya human masuta nga apil siya sa  anomaliya, then wa sab siya’y madawat nga separation pay gikan sa iyang company kay duna may gibasehan ang pagkataktak kaniya. Thanks and God bless.- Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.