Pacquiao manggiloy-on

Si  Senador Manny Pacquiao gikan sa pamilyang pobre kaayo. Kon unsay kapait nga nasinati sa mga batang yagit diha sa pagpaningkamot sa pagpakabuhi sa kadalanan adlaw ug gabii, naagian pud kini ni Manny. Gusto si Manny nga magboksidor kay niini lang paagiha nga makadawat siya’g premyo nga sarang ikatabang niya’g gasto sa nagkabikusbikos nilang kahimtang sa pamuyo. Gani, kutob ra intawon si Manny sa hayiskol.

Hinuon, ang Mama Dionesia ni Manny, kanunay’ng nakig-estorya sa Ginoo diha sa wala’y bugto niyang paggunit og rosaryohan samtang nag-ampo atubangan sa altar matag adlaw. Hugot ang pagtuo ni Mama Dionesia nga kon kita, tawo, dili lang gyud mobulag Kaniya, ang Ginoo na maoy mopahamutang daan sa tanan natong panginahanglan sa nagpaabot natong unahan.

Ug gimatuod sa Ginoo nga wala’y imposibleng butang nga dili Niya mahimong posible diha sa kinasingkasing nga pag-ampo. Nahimong 8 Division World Boxing Champion si Manny ug nabilyonaryo.

Ang nakanindot lang, kay bisa’g habog na kaayo ang kapopular ug ang kadato ni Manny, wa gyud niya palupara ang iyang mga tiil. Gipabilin niya kining magtugkad sa yuta hangtud ning mga adlaw nga ang tibuok kalibutan mihangad na kaniya. Hinungdan, nga ma-feel gihapon ni Manny ang kalibutan sa mga pobre, diin siya gikan. Ug dili lang tuyoon, aboton gyud siya’g kalooy sa kahimtang sa mga kabus. Ang kadali ra gyud niyang makatunol og dinagkong tabang.

Niadtong pipila lang ka adlaw ang nakalabay, usa ka pobreng sorbetero, kinsa bag-o lang nakagawas sa ospital, wala’y ikapalit sa giresitang tambal, wala’y ikabayad sa enrollment sa mga anak, ang dihadiha gihataga’g kuwarta ni Manny para ipalit og tambal ug para enrolment sa mga bata.

Unya dihang nahibaw-an ni Manny nga ang gipuy-ang balay sa tibuok pamilya inabangan lang, haskang daliang nakasulti ni Manny: “Karon, karon dayon, hatagan tika’g lote ug balay.” May lain pa’ng pakapin nga gisaad. Hatagan pa gyud ni Manny og permanenteng trabaho ang sorbetero. Pagka suwerte!

Kini nagpaila lang, nga si Senador Pacquiao maluoy gyud og pobre. Busa, no wonder, nga paulanan gyud og  daghang blessings si Manny sa Ginoo kay kaantigo man siya mobahinbahin niini sa mga kabus nga uhaw sa kaharuhay ning kinabuhia.