Nganong dili man sila magkasabot?

Giingon dinhi nga uncertain kuno ang pag-develop sa Kawit Island. Hinumdoman nga tungod kay proyekto ni Mayor Tomas Osmeña, gibabagan kini sa taga-opposition sa rason nga disadvantageous ang 90-10 sharing scheme sa kabahin sa siyudad.

Karon nga lagmit makuha ni Mayor Tom ang mayoriya sa konseho, aduna ba’y kahigayonan nga ma-reintroduce ang resolusyon pag-develop sa isla sa Kawit ubos sa joint venture agreement (JVA) uban sa Gokongwei-Universal Hotels & Resorts Inc.?

Tubag sa taga-opposition: Dili. Kini tungod kay kadto ra nga nisupak sa resolusyon maoy maka-refile sa resolusyon nga ilang gisupak.

Nagpasabot nga bisan kon mayoriya na ang mga konsehal ni Mayor Tom, apan kon dili mo-reintroduce ang mga konsehal nga misupak niini, wala kuno’y kahigayonan nga mabanhaw ang tinguha niini pag-ugmad sa Kawit Island.

Alang nako, maunsa man ang gamot sa ilang mga disagreement, kon makita nga makaayo sa dakbayan ang maong proyekto, dili ba mahimo nga ila kining lingkoran, in a closed door haggling and bargaining, temporarily setting aside politics, ug ilang sabotan unsa’y angay’ng buhaton aron mahinayon gayud ang maong proyekto?

Dili ba ni nila mahimo? Dili lang una sila maghunahuna sa 2019 elections, kon dili, ang kaayohan sa dakbayan. Ang Sugbo ra ba dili partidista. Mopili kita primarily pinasikad sa qualification sa mga local candidates ug dili tungod sa partido nga ilang gisandigan.

Sa ato pa, ang ato karong incumbent nga mga konsehal, atong gipili dili tungod sa ilang pagka-BOPK, o pagka-Team Rama (karon PDP-Laban na sila), kon dili, gumikan sa ilang mga katakus. Kon magpadayon kining pagdinumtanay sa grupo nila ni Osmeña ug Rama, ug kon dili sila makahuwat sa kumbati sa eleksiyon karong sunod tuig, nan, dimalas kitang mga Sugbuanon.

Unya, lagmit ma-three-cornered fight kining umaabot nga eleksiyon, tali nila ni Osmeña, Rama, ug Vice Mayor Edgar Labella, ang chair sa PDP-Laban, Cebu City. Kon maoy sabakon sa PDP-Laban si Labella as its official candidate, alegre kaayo ang eleksiyon.

Ug unsay mahitabo sa Team Rama-PDP Laban? Duha na unya’y kandidato ang PDP-Laban? Ang Team Rama-PDP-Laban ug Team Labella – PDP-Laban? Unya naa pa’y grupo ni Presidential Assistant Mike Dino nga nakahunahuna sad tingali nga mag-mayor! Samot ka alegre.

Hinoon, kon unsa man nga mga kasikas sa politika nga ato unyang masaksihan sa dakbayan, ang tuyo niini, sa side sa opposition, mao ra gyud ang pagpukan sa liderato ni Osmeña ug pag-ilog sa City Hall.

In the meantime, wala lang unta’y pamolitika pagkakaron!