Konsabo

Kaniadtong miaging semana, mipagawas og kamandoan ang hukmanan sa Dakbayan sa Mandaue nga nagmando sa pagpaguba sa mga estraktura nga gipangtukod sulod sa 20 metros nga easement zone gikan sa kadagatan sa lungsod sa Santa Fe sa isla sa Bantayan.

Kining maong kamandoan akong nahinumdoman dihang ako ug ang akong pamilya miadto kami sa Basdako sa lungsod sa Moalboal kaniadtong Domingo.

Mga katapusan sa dekada 90 pa ako katapusang nakataak sa lugar kay didto mi nag-culminating sa usa sa among subject sa akong kurso sa post graduate program nga Master in Public Administration.

Hawan pa ang maong dapit ug klaro kaayo nimong makita sa layo ang lapad nga bas sa unahan. Wala pa’y mga estraktura nga nagbarug sa lapyahan sa dagat. Pero niadtong Domingo, lahi na ang akong nakita. Daghan na nga dagkong estraktura nga gipangtukod sa dapit ug ang nakapadapit sa akong pagtagad mao ang mga estraktura nga anaa na gayud gitukod sa lapyahan.

Klaro ug tataw kaayo nga kalapasan kini sa 20 metros nga easement zone nga gisitar sa balaod. Nganong gitugotan man kining maong mga estraktura nga tukoron sa dapit sa dagat nga gidili sa balaod?

Dili ko motoo nga wala masayod ang lokal nga kagamhanan sa lungsod sa Moalboal niining gidili nga estraktura nga gitukod sa daplin sa baybayon tungod kay sa dili pa kini makabarog moagi man gayud kini sa buhatan sa lokal nga kagamhanan sa lungsod sa Moalboal. Kon imong tinambanon sa pagsabot, nagkonsabo ang nagtukod sa estraktura ug ang mga opisyal sa lungsod sa Moalboal sa paglapas sa balaod.

Human sa Moalboal, mihapit mi sa Bay Walk sa dakbayan sa Naga kay nakadungog ko nga nindot suroyan ang dapit. Tinuod gyud ang ilang gisulti. Nindot ang dapit, apan ang problema lang kay hugaw, baho ug buslot ang sira sa ilang kasilyas diin pabayron ka og P5 sa imong paggamit. Awhag nako sa nagdumala sa Bay Walk, butangi og tiglimpyo ang inyong pansayan.