Karaang problema

Gibanabana nga kapin sa 20 milyones ka tinun-an sa mga publikong tunghaan sa tibuok nasud ang mobalik na sa klase ugmang adlawa.

Subsob ang pagpangandam sa mga tunghaan sa niaging semana pinaagi sa pagpahigayon sa tinuig nga Brigada Eskwela diin ang mga ginikanan, tinun-an, ug mga magtutudlo nagtinabangay pagpanglimpyo ug pag-ayo sa mga gikinahanglang ayohon aron maandam ang mga lawak saringan pagbukas sa klase.

Apan luyo sa mga pagpangandam, ang Department of Education admitido nga dunay mga tunghaan nga dili pa gyud andam.

Si DepEd-7 director Juliet Jeruta miingon nga dunay ubang mga tunghaan nga nagpadayon pa ang construction sa mga classroom. Dunay ubang tunghaan nga posible nga magkuwang gyud og classroom.

Dili na hinuon ni bag-o. Naanad na ta nga matag sugod sa klase, dunay mga estudyante nga adto magklase ilawom sa punoan sa kahoy.

Ang uban magsawo og classroom. Dugay na kaayo kining maong problema apan hangtud karon wala gyud masulbad sa atong gobiyerno.

Tingali, naanad na sab sila nga mahatagan lang og atensiyon ang maong problema atol sa pag-abli sa klase hinungdan nga wa sab ni nila hatagi og prayoridad.

Ang DepEd usa sa mga ahensiya sa gobiyerno nga dunay labing dakong pahat sa budget. Pero nganong dili masulbad ang kakuwang sa mga classroom?

Nganong matag-abli sa klase magpunay og balik ang samang problema nga nasinati sukad pa niadtong panahon sa atong katiguwangan? Ang sagad nga rason sa mga opisyal sa DepEd midaghan ang enrollment matag tuig.

Ang maong rason nagpakita sa kainutil sa mga tagdumala sa maong ahensiya. Kon imo silang pangutan-on sa gipaabot nga gidaghanon sa mga tinun-an nga mosulod sa klase, duna sila’y andam nga tubag.

Sa ato pa, ila na nga mabana-bana ang gidaghanon sa mga mosulod sa klase matag tuig, apan nganong dili nila mabana-bana ang gidaghanon sa mga classroom nga gikinahanglan?

Motuo na lang hinuon ko sa dugay na nga pagtahap nga ang hinungdan niini mao nga dili nila gustong gamiton ang pundo aron himoong savings para sa ilang kaugalingon.

Aron inigtapos sa tuig, may magamit sila nga bonus sa ilang mga opisyal.