Makasupak ba ang nag-abang kon gamiton na sa tag-iya ang yuta?

Dear Atty. Divine,

Duna ko’y pangutana labot sa yuta nga among gipuy-an sulod na sa 40 ka tuig.  Dili kami ang tag-iya sa yuta, ug gusto na sa tag-iya nga kami ilang papahawaon kay gamiton na nila ang yuta nga gipaabangan nila kanamo.

Ang akong pangutana kon may katungod ba kami nga mosupak ug mobabag sa pagpapahawa namo, considering nga dugay na mi nga nagpuyo sa maong lugar? Unsa’y angayan namo nga buhaton? Daghang salamat.- Mira

* * *

Dear Mira,

Bisan kon 40 ka tuig na kamo nga nagpuyo sa maong lugar, dili gihapon kamo makabuot kon gamiton na sa tag-iya ang maong yuta.

Kini bisan pa kon nagbayad pa kamo og abang sa inyong pagpuyo sa  maong lugar, kay base sa balaod, ang tag-iya sa usa ka property, sama sa yuta, maoy dunay katungod nga modesisyon kon unsa’y iyang buhaton niini. Kon aduna mo’y contract nga gipirmahan, ang inyong buhaton mao lang ang paghangyo sa tag-iya nga tiwason ang term sa inyong contract, apan kon wa mo’y pinirmahan, then inyo na lang hangyuon ang tag-iya nga hatagan mo og igong panahon aron makapangita mo og kabalhinan. Thanks and God bless. -Atty. Divine

* * *

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.