Suyop
Makalingaw ang nagpadayong away sa politika dinhi sa dakbayan sa Sugbo, tali sa kampo ni Mayor Tomas Osmeña ug kanhi mayor Michael Rama, nga hangtud karon wala pa gyud makadawat sa iyang kapildehan.
Sa interview ni Jason Monteclar kagahapon sa sibyaanan dyCM, nalingaw ko nga namati ni Rama. Duna man gyud sab ni siya’y talagsaon nga karisma ug makatakod nga kabibo. Bilib ko sa iyang kadasig ug ka positibo. Atol sa interview, gipangutana si Rama kon kinsa ba gyud ang klaro nga lider sa oposisyon dinhi sa dakbayan? Nitumaw man gud ang kalibog sa ilang mga kauban sa oposisyon kon kinsa nilang duha ni Bise Mayor Edgar Labella ang matawag nga lider sa ilang partido.
Matud ni Rama nga wa’y laing lider sa ilang grupo kon dili siya. Iyang gisaysay giunsa pagsugod ang Team Rama. Matud niya nga namugna ni dihang mitalikod sila sa Bando Osmeña Pundok Kauswagan ug nagtukod og kaugalingon nga grupo. Gipadangat ni Rama ang iyang kahimangod kon giunsa pagtamay ug pagbugal- bugal sa ilang kaatbang ang ilang grupo nga nagdala sa iyang bansagon. Matud niya nasubo kaayo siya nga gibansagan ni sa ilang kaatbang nga “Team Suyop.”
Dinhi niining maong punto sa interview, daw sa giganoy si Rama sa iyang kapungot ug miluwat og mga pasangil nga wala ko magtuo nga iyang mahimo labi pa nga siya usa ka abogado. Iyang gipasanginlan si Konsehal Margot Osmeña, ang asawa ni Mayor Osmeña, nga matud pa maoy tinuod nga “mosuyop.” Ambot unsa’y iyang gipasabot niadto, apan dinhi sa ato ang “suyop” nagkahulogan ni og paggamit og ilegal nga drugas.
Duna sab siya’y mga seryosong pasangil batok sa mayor sama sa “kawatan, berdugo” ug uban pa. Ang mayor nga gikuhaan og reaksiyon sa media may labot sa pasangil batok sa iyang asawa, igo lang miingon nga na “praning” na ang kanhi mayor.
Pastilan, ingon na ba niini ka hugaw ug ka desperado ang atong mga politiko sa dakbayan? Dili ba mahimo nga ibase lang sa mga lihitimong isyu ug isalikway ang personal nga mga pasangil nga wa’y pruweba?
Ambot og pasayloon ba sa kampo ni Osmeña ang maong seryoso nga pamasangil, o magpaabot ta og boroka sa mosunod nga mga adlaw.
* * *
- Latest