PWD teacher angay nga panaminan

Dalaygon kaayo ang usa ka Grade 6 public school teacher nga si Morishka Nicole Uy kay bisa’g usa ka paa na lang ang nahibilin kaniya human mahiagom sa usa ka dugoong aksidente sa dalan, wala gyud siya kawad-i og kadasig sa pagpadayon og gamit sa iyang propesyon. Hangtud karon, sama ra siya sa usa ka normal nga maestra, nanudlo gihapon.

Iyang rason kon nganong mipadayon siya, kini aron iyang ikasilsil sa alimpatakan sa mga bata, nga ang pagkabaldado, o PWD, dili dakong babag sa pagpakabuhi sa minatarong ug dalaygon nga paagi.

Mao nga bisa’g dakong kalbaryo alang sa iyang pagngadto-ngari sa eskuylahan, puno kanunay ang iyang kasingkasing sa pagpangalagad sa mga bata, kinsa matud pa ni anhing Dr. Jose Rizal, mao ang umaabot nga kaugmaon sa atong nasud. Pagkatahom nga prinsipyo!

Tingali, sa pag-agi ni ma’am sa kadalanan ning siyudad, nakita niya ang mga batang bulingit nga nagpakabuhi sa aseras, ang mga isnatser nga manglabni la’g kalit og bag, ang mga hold-aper nga manion og kutsilyo, o pusil sa tapad nga pasahero, ang nagkalainlaing anino nga bisa’g himsog pa kaayo og lawas nagpakilimos kutob sa mga sakyanan nga manghunong.

Nahadlok si ma’am nga basi’g mao kini ang dangatan sa mga bata ugma damlag. Basin og mapareho sila sa mga badlungon karon nga nagpasad lang sa atong palibot, diin mahilig magpakabuhi sa kangitngit.

Sama sa mga kawatan, o akyat bahay, kinsa dili gyud moila og silingan oras nga mosugmat ang ilang sakit sa pagpangawat. Kini tungod kay sila kulang man sa edukasyon. Wala’y kurso nga nahuman.

Pero, yuna, dili ba diha sa Kongreso ug Senado, ubay-ubay man nga mga tadhang professionals ang giimbestigahan kay naduhig sa kasong pagpangawat?

Ang gikawat ra ba, kuwarta sa katawhan, lakip na ang kuwarta sa mga makililimos (kay taxpayer sab baya ang beggars). Mao nga unsa na kaha ang wa’y grado?

Bilib ko ni ma’am uy, kay bisa’g baldado na, nagpakabuhi  sa kahayag ug nagpadayon og tudlo sa kabataan nga kinahanglang magpakabuhi gyud sa kahayag, aron nga kon sila ma-professional na, dili sila mahisama sa ubay-ubay’ng iladong tawo, kinsa luho kaayo ang pamiste ug pamuyo, pero ang source of income, puro diay kinurakot.

Kanimo, ma’am, saludo ako! Bulawan kang salamin nga angay kapanaminan!