Padung sa halayong Tagaytay

Layo gyud ang Tagaytay Ampongol  kay lagi piyesta man didto. Sa halayong lakaw nahimong kapoy ang pagtadlas ilawom sa init sa adlaw. Pangilin ni San Isidro ug bisan lisud sabton kun nganong sa tumoy gyud ibutang ang kapilya ni Sidro.

Sa maong panaw ako nakapamalandong nga ang kinabuhi usahay subidahon labina kun nahimong lisud tugkaron ang misteryo niini. Labinang subidahon kini kun nakita nimo nga ang imong kaugalingong kapasidad ang maglisud sa paghimo sa ingon. Subidahon kini labina kun nahimong daw sa hanap ang rason sa pagpanaw niini.

Pailob ang kinahanglanon aron mahimong mabulokon gyud unta ang panaw apan ang modernong teknolohiya nagtudlo kanato nga kinahanglan kitang molihok sa mas paspas aron dili mahimong sayang ang panahon sa way hinungdang panghunahuna ug balansayon.