Warning ni Duterte

Niini’ng panahona, matag yawyaw gani ni Presidente Rodrigo Duterte batok sa negosyo sa gidili’ng druga, dili gayud siya masipyat paglakbit sa Sugbo isip nag-una nga lugar sa nasud diin naghitak pa gihapon ang druga.

Gani iya na usab ang gilabhan ang mga nalambigit dinhi atol sa iyang diskurso sa kasumaran sa pagkahimugso sa Philippine Navy. Matud niya nga kon gusto sa mga suspetsado sa druga sa Sugbo nga mabuhi pa og dugay, mas maayo pa nga adto sila magluklok sa prisohan.

Pipila ka adlaw sa wala pa ang mao nga pamahayag, gilabhan usab ni Presidente Duterte si Daanbantayan Mayor Vicente Loot tungod sa giingon nga pagkalambigit sa kanhi heneral sa kapolisan sa druga. Sa iya nga pagbisita sa Sugbo sa niagi nga semana, ang presidente miakusar nga dunay higayon nga nagbaha kuno ang druga sa kwarto sa balay ni Loot. Hinuon, hagbay ra nga gihimakak ni Loot ang alegasyon ni Duterte. Gani, gusto kuno siya nga makigkita ni Duterte aron malimpiyohan ang iyang ngalan. Daghan ang nakapangutana kon unsa gayud ka kasaligan ang tinubdan ni Duterte kabahin sa taho nga nag-una ang Sugbo sa problema sa druga sa nasud. Diin gikan ang mao nga rekord? Siguro gikan sa kapolisan ug Philippine Drug Enforcement Agency.

Apan makaingon usab kita nga tinuod ang mao nga akusasyon sa presidente kabahin sa naghitak nga druga dinhi. Kini tungod kay nasayod kita nga daghan sa mga personalidad kinsa giakusahan ni Duterte nga nalambigit sa druga pulos man nagbase sa Sugbo.

Ug niini’ng iyang ulahi nga pamahayag, basin kon adunay manghagba na usab nga mga suspetsado sa druga. Hinuon halos matag adlaw na ang mga pagpatay dinhi sa mga personalidad nga giingon nga nalambigit sa druga. Daghan kanila ang misukol kuno sa kapolisan atol sa mga operasyon.

Magsilbi usab nga warning kini nga maong pamahayag ni Duterte. Alang kaniya, mas maayo nga magpapriso na lang kadto nga mga drug pusher ug dealer dinhi kay sa maabtan pa sila sa sanggot ni kamatayon.