BRT gisuway’g kamang sa Kongreso

MAKATI –– Nakalingkod si Senator Tito Sotto isip ika-24 nga Senate President nga walay krisis. Kini tungod kay niadto pa diay’ng Enero na-estoryahan sa mga kauban niya mga senador nga papulihan na ni Sotto si Koko Pimentel.

Kun dili lang sa hangyo ni Koko nga magpabilin siya hangtod sa iyang birthday unya hangtod na pud sa iyang kasal sa Oktubre, napulihan na gyud diay siya dugay ra.

Walay mibabag sa paglingkod niya, nga bisan ang minoriya pinanguluhan ni Senador Franklin Drilon uyon nga ang Sugboanong si Sotto ang iyang pangulo.

* * *

Niadtong Miyerkules, may impormasyon gikan sa Kongreso nga si Kongresista Raul del Mar misuway og papasar og resolusyon nga magsuporta sa Cebu BRT Project. Apan wala kini madayon tungod kay nababagan sa ubang mga kongresista nga sakop sa House Committee on Transportation pinanguluhan ni Kongresista Cesar Sarmiento sa Catanduanes.

Unsa pa may ipamugos nga ang BRT project nagtinga na man sa ICU sa NEDA. Nasayod na ang mga magbabalaod ug ang Malacañang nga ang BRT dili magsilbi sa siyudad sa Sugbo, apan gipamugos lamang tungod sa kasinaw sa P18 bilyones nga loan sa World Bank.

Kon gitubag o natubag pa lang unta sa mga proponent sa BRT ang mga kuwestiyon sama sa kawalay road widening, asa gastuhon ang P18 bilyones, pila ra ang makasakay ug ang dautang epekto sa nagtrapik nang kadalanan, tingali bagang suporta ang madawat sa BRT. Pero pulos negatibo ang impresyon gikan sa mga opisyal dinhi sa kauluhan.

Survey nga nagpabor sa BRT? Aduna ba guy survey nga bias? Tiaw mo na, sa maong survey taas og rating si Mayor Tomas Osmeña unya sa samang survey daghan kunong Sugboanon ang uyon sa BRT.

Kay ngano, nakasakay na diay og BRT ang mga Sugboanon? Ilad-ilad.

* * *

Gisaway sa mayor sa dakbayan sa Sugbo si Kalihim Mike Dino kay nganong gidala niya ang mga bag-ong nakadaog sa SK election dinhi ngadto sa Manila.

Matud sa mayor, “meddling” kuno sa SK affairs ang gibuhat sa kalihim.

Pero sa balita sa laing pamantalaan, ang mayor miingon nga mo-endorso siya og kandidato sa SK federation.

Asa man ang meddling anang pagdala sa mga bata sa Senado ug Malacañang ug anang pang-endorso og kandidato?

Ang pagdala ni Dino sa mga bata sa Senado ug sa Malacañang dili okay?

Unya ang pag-endorso ni Tomas og kandidato sa SK federation nga klarong pagpanghilabot okay lang?

Gibangkong na ning kalibutana.