Ang uso karon

Sakit sa ulo, dughan ug kasing-kasing ang gipauso ning panahona. KAGUOL! Tungod sa suliran nga wa ta masayod kinsa ang makasulbad. KADUNOT! Ang uso karon nga akong gihulagway nga nakapasakit sa ulo, dughan ug kasing-kasing sa katawhan mao ang UMENTO.

Senemanang umento sa presyo sa mga produktong petrolyo. Umento sa bayranan sa tubig ug kuryente. Umento sa matrikula ug pletihan. Umento sa presyo sa mga nag-unang palaliton ug daghan pa.  

Ang umento sa presyo sa mga produktong petrolyo kun imong ihulagway mura na og rocket ang gitas-on sa pagsulbong sa iyang paglupad. Sayod kita nga ang umento sa presyo sa mga produktong petrolyo dako gayod kaayo og epekto sa mga nag-unang palaliton.

Ang umento sa bayranan sa kuryente ug tubig ang misakay usab sa uso. Dugang kining pabug-at nga gipatong sa abaga ni Juan dela Cruz nga nag-ilaid na sa grabeng kalisod.

Ang umento sa matrikula ug pletihan makapabuktot na sa mga ginikanan nga nagpatungha sa ilang mga anak. Makapasamot kini sa kabug-at sa suliran nga ilang gipas-an ug dugang pa niini ang pagmahal o pag-umento sa mga nag-unang palaliton sama sa bugas ug uban pa.

Ang gipauso nga “umento” makapasakit gayud sa imong ulo, dughan ug kasing-kasing.

                                    ***

Nadakpan sa mga polis sa dakbayan sa Mandaue ang bag-o lang nga napiling numero uno nga Sangguniang Kabataan Councilor sa Barangay Zone 13, Baybay City, Leyte nga si Jesjoma Nomar Aranas, 20, kay nagdala og 300 gramos nga uga nga dahon sa Marijuana.

Ang Marijuana nga nasakmit gisulod sa dinakpan sa iyang bag dihang naatlan sa mga polis nga nagpahigayon og checkpoint sa dapit. Ang Marijuana gamiton unta kini sa victory party sa mga bag-ong napili nga SK officials sa nahisgutang lugar.

Mangutana lang ko, unsa ba diay ning mga napili nga SK officials sa Baybay City, Leyte mga adik?