Ipahungaw ayaw pugngi (1)

Daghang mga salikwaot nga reaksyons sa paghinabi nato mahitungod sa pagpahungaw sa toksik nga hangin gikan sa atong ginhawaan nga gibuhot sa lubot (farting). Ilabi na kon naa ta sa pundok nga gialirongan sa mga kauban, mapugos kita nga pugngan ang kagawsonon, basig matumbok ang gigikanan sa makalanag nga baho, manlipaghong gyud ang nawong nato sa kaulaw.

Usahay ra ba sungogon ta sa higayon, kay sa tantong pinugong mosipa hinuon. Unya kon mapugngan man, dili magdugay mora ka’g kalipongon, tungod kay mas nigrabe na’ng nikatap ang hilo (toksic gasses) sa ginhawaan o tinai. Mag-alburoto kini nga mora’g dunay nagdagandagan nga nagdabog ilawon sa atong tiyan.

Dili kini angay ikaulaw, kay senyales kini nga maayo pa motrabaho ang makina sa imong lawas. Ang bahong toksik nga gasses, resulta kini sa pagpihig sa mga makadaut nga kemikal, nga natural ibuhot sa lubot.

Kay kon dili ni makagawas, mawad-an ka’g enerhiya o kusog, maamong sa kadaut ang katibuk-ang mga sistima sa atong lawas. Dinhi magsugod ang mga sintomas hangtud magkasakit ta.

Busa di gyud nato ikaulaw, kay kon mohungaw kini, nagtimaan kini og ;

* Unang pahimangno - nga motug-an sa tinuod nga kahimtang sa panglawas mo.  Ang toksik nga gasses, kalibrahe usab kini sa sayong senyales sa di maayo’ng gipamati sa lawas. Kon sa atong paminaw nga magpirmi na kini, lain na ang kahulugan ini, busa maayong mobisita sa doktor, aron  kahimoan dayon og aksyon.

* Pamenus sa butod (bloating) – usa ka kondisyon nga motumaw kini aron pagpamenus sa butod sa tiyan ilabi na kita nasubraan sa pagpatuyang nato og kaon. Usahay magdaguok nga mora og dunay hangin nga modagandagan ilawom sa atong tiyan, nga taudtaud mahuwasan kita kon makahungaw na ni.