“Kawat Island Project”

Angayang magbantay ang mga Sugboanon nianang P18 bilyones nga Kawit Island multi-billion project nga gipanghambog ni Mayor Tomas Osmeña.

Kun paminawon ang mayor, makaingon ka nga ang iyang pagpamugos sa Konseho sa dakbayan sa Sugbo nga hatagan siya og gahum aron mopirma og kasabutan tali sa JG Summit aron i-develop ang Kawit Island isip dako nga resort ug casino.

Ang wala nako ma-uyoni mao ang pagsige og tiyabaw sa mayor nga ang mga dili BOPK sa Konseho nga gipanguluhan ni Bise Mayor Edgardo Labella mga sakop sa Team Babag. Kay matud niya gibabagan ang iyang proyekto.

Maayong pakgangon si Tomas nianang puntoha. Kon ang mga konsehal sa BOPK nga “stamp pad” niya nga motamla lang sa pirma bisan unsay iyang gusto, dili na mabuhat ni Labella ug sa iyang grupo sa PDP Laban.

Ang proposal gibalik na nilang Labella ngadto sa komitiba aron tun-an ang ilang mga suhestiyon aron dili maalkanse ang mga Sugboanon.

Unang gikuwestiyon nilang Labella ug mga konsehal sa PDP Laban mao ang share nga makuha sa kagamhanan sa siyudad gikan sa kitaon sa kompaniyang motukod og resort ug casino sa Kawit Island.

Sa papirmahang kasabutan, ang siyudad makadawat lamang og 10 porsiyento samtang ang kompaniya sa mga Gokongwei magdawat og 90 porsiyento sa kita.

Timan-i ninyo nga ang yuta sa Kawit Island nagbalor og P10 milyones unya ang puhonan nga ibubo (kun ibubo tanan walay labot sa kickback) magbalor og P18 bilyones.

Unya pa gyud, ang siyudad sa Sugbo makadawat lamang sa maong 10 porsiyento nga bahin sa ika-siyam nga tuig gikan sa pagpatuman (human sa pinirmahay) sa kontrata.

Pananglit og mubo ang kita sa rental sa edipisyong tukoron sa Kawit island, walay makuha ang siyudad? Siyaro, wala gyuy “minimum guaranteed earnings” ang siyudad sa ibubo niini nga P10 bilyones nga balor sa yuta?

Kining maong proyekto pagatawgon og Integrated Resort Development. Sa ato pa, aduna usab kini kitaon gikan sa hotel, convention center, restaurant, casino, ug uban pang negosyo. Siyaro, wala gyuy bahin ang siyudad gikan ning mga negosyoha? O dunay bahin pero adto mapunta sa bulsa?

Ang gipanghambog ni Tomas nga mohimo ang maong proyekto og 5,000 ka trabaho.

Yati ra!

Si DTI Secretary Ramon Lopez mianhi sa Sugbo niadtong 2016 aron magkumbinser ni Tomas nga tugotan ang SM pagtukod og SM Arena ug Oceanarium diha sa South Road Properties. Apan gibalibaran kini ni Tomas.

Kon gusto ang mayor og 5,000 ka trabaho diha sa SRP, nganong gibalibaran man niya ang SM Arena ug Oceanarium sa SRP?

Kon dili kita magbantay, ang Kawit Island mahimo na hinuon kanang “Kawat Island Project.”