Atik sa COMELEC
Nisangpot na ang binuang sa kadagkoan sa Commission on Elections (COMELEC). Padayon silang niinsistir nga inay magpatabang sa ilang election officers sa mga lalawigan, dakbayan ug kalungsoran, giimbudo ang tanang kalihokan sa tibuok nasud sa law department sa ilang ulohang buhatan.
Uwahi na nga napagawas ang listahan sa disqualified nga mga kandidato sa barangay ug Sangguniang Kabataan (SK), maong nahinayak na ang mga kandidato sa pagpangampanya ug ang mga botante sa pagpili nila. Aron lang badlongon ang mananaog nga dili diay sila makalingkod ug pahibaw-on ang mga botante nga nausik lang ang boto nila.
* * *
Ang election officers unta ang labing nasuheto sa mga nagpapili sa mga barangay sa ilang mga hurisdiksiyon ug sila unta ang labing una nga makadawat sa mga reklamo gikan sa mga kaatbang sa politika ug ubang nagpakabana nga mga sektor:
Kinsa sa mga nagpapili sa SK ang kuwang, o subra sa edad, o paryente sa incumbent nga lokal ug nasudnong mga opisyal; ug
Kinsa sa mga nakapasaka sa ilang certificates of candidacy (CoCs) nga napapas na sa listahan sa mga botante, o wa marehistro sa mga barangay nga ilang gidaganan.
* * *
Pipila ra ang mga kawani sa law department sa COMELEC ug tulo ra ka semana ang lugway pagsubli sa CoCs maong naapsan sa panahon pagsusi sa kapin sa milyon (1,140,987) ka CoCs alang sa 671,178 ka katungdanan sa 42,000 ka barangay sa 1,625 ka dakbayan ug kalungsoran:
722,081 ka COCs sa piniliay sa barangay — 87,127 pagka barangay kapitan ug 634,954 pagka barangay konsehal; ug
418,906 ka COCs sa SK — 83,127 pagka SK chairperson ug 335,779 pagka konsehal sa SK.
* * *
Sa adlaw sa piniliay niadtong Lunes, Mayo 14, siyam ka kandidato sa Central Visayas ang gi-disqualify sa COMELEC. Usa ka adlaw human sa piniliay, 22 ang ilang gi-disqualify sa Sugbo. Gamay ra kon itandi sa 267 ka kandidato nga girekomendar sa COMELEC Cebu nga i-disqualify.
Mahimong mas daghan ang disqualified nga mga kandidato nga naproklamar na. Nipasalig ang COMELEC nga taktakon ang nakalusot nga mga politiko pinaagi sa quo warranto, 10 ka adlaw human sa ilang proklamasyon.
Hinaot nga wa sila molukdo og dugang gimbuhaton nga dili na sab matuman sa tukmang panahon.
* * *
- Latest
