Biktima sa politika

Ako’y gisayangan sa pagbasura sa konseho sa dakbayan sa Sugbo sa joint venture agreement alang sa usa ka dako nga development project nga gitinguha unta nga tukoron sa usa ka kompaniya diha sa kanhi Kawit Island nga karon kabahin na sa South Road Properties.

Dako unta kini og ikatabang sa panalapi sa siyudad.

Kini tungod kay mohakot ang mao nga proyekto og bilyones ka pesos nga revenue, gawas nga momugna kini og dili momenos 5,000 ka trabaho alang sa mga Sugboanon.

Apan tungod lagi sa dula sa politika, mora og bula nga nawagtang ang proposal sa maong kompaniya pagtukod og dako nga integrated resort ug casino sa kantidad nga P18 bilyones, ug gikahadlokan nga basin unya kon mo-back out na gayud ang maong investor.

Sa niaging semana, wala kapasar sa konseho ang resolusyon nga nagtugot kang Mayor Tomas Osmeña pagpirma sa joint venture agreement uban sa Universal Hotels and Resorts Inc. (UHRI), nga maoy mo-develop sa maong proyekto.

Aduna kuno’y nakit-an nga buslot ang mga sakop sa oposisyon sa maong agreement nga dili pabor sa dakbayan.

Mao na nga sa dihang miabot ang botohan, gilupig ang mga kaalyado ni Osmeña sa oposisyon, sa boto nga 9-8.

Puwerte nga nakatagawtaw si Osmeña sa mao nga kalamboan.

Iyang giakusahan ang oposisyon diha sa konseho nga namolitika ug nga ang labing ulahi nga biktima niini mao ang proposal sa UHRI.

Gisayangan kuno siya tungod kay liboan unta ka trabaho ang mawala pa sa kamot sa mga Sugbuanon.

Wala ko’y gidapigan sa duha ka habig, apan dili usab nato mabasol si Osmeña.

Alang kaniya kwarta na unta kadto, apan nahimo na hinuon nga bato.

Dugang unta kadto nga ganansiya sa dakbayan nga mahimong igasto sa mga proyekto alang sa kalamboan sa mga molupyo niini.

Hinuon, adunay purohan nga mabuhi pa kadto nga proposal.

Apan magpaabot pa si Osmeña og dugang kaalyado sa konseho aron molabaw ang iya nga numero sa botohan.

Apan kuyaw usab kon mangluod na ang maong kompaniya ug dili na hinuon mopadayon sa investment niini.

Kon mahitabo kana, alaot gayud ang siyudad nga nahimong dakong biktima sa dula sa politika sa mga maayong laki diha sa City Hall.