EDITORYAL – Proteksiyon sa OFWs

NILAGDAAN na noong Biyernes ang memorandum of understanding (MOU) sa pagitan ng Pilipinas at Kuwait. Maraming OFWs na nasa Kuwait at bansa ang nakahinga nang maluwag makaraang lagdaan ang MOU na ilang buwan ding nalagay sa balag ng alanganin. Nagmuntik-muntikanang hindi matuloy ang lagdaan makaraan ang makontrobersiyang rescue ng mga tauhan ng Philippine Embassy sa dalawang Pinay domestic helpers na minamaltrato sa nasabing bansa. Kinunan pa ng video ang pag-rescue at ini-upload sa internet at naging viral.

Hindi ikinatuwa ng Kuwaiti government ang ginawa ng mga taga-Philippine Embassy kaya pinatalsik ang ambassador ng Pilipinas. Binantaang aarestuhin ang mga tauhan ng embahada. Hindi makalabas sa embahada ang mga tauhan sapagkat dadamputin sila paglabas sa gate. Pero mabilis namang naayos ang gusot sa pagitan ng dalawang bansa at natuloy na ang paglagda sa MOU. Kabilang sa mga lumagda para sa Pilipinas si Foreign Affairs Sec. Alan Peter Cayetano at Labor Sec. Silvestre Bello III.

Sa paglagda sa MOU, nakakatiyak na mapuprotektahan na ang mga OFW sa Kuwait partikular na ang mga domestic helpers. Mababawasan na ang mga pang-aabuso sa mga DH. Kabilang sa mga pinagkasunduan ang pagbibigay ng dayoff sa mga DHs, hindi na ang amo ang hahawak ng passport kundi ang Philippine Embassy, sapat na tulog at maayos na pagkain at tamang suweldo. Hindi na rin maaaring ipagamit ang Pinay DH sa mga kapatid o magulang ng amo.

Ngayong may proteksiyon na, hindi na marahil mauulit ang nangyari kay Joanna Demafelis na pagkaraang patayin ng amo ay inilagay ang bangkay sa freezer. Nagpahiwatig ang Labor Secretary na maaaring i-lift na ang ban sa deployment ng workers sa Kuwait.

Ganunman, kahit na nagkaroon ng kasunduan, patuloy pa ring magmatyag ang pamahalaan at baka mayroon pa ring lumabag sa kasunduan. Sana, ganito rin ang maging kalagayan ng ibang OFWs sa Middle East.