Desperadong pamolitika

Pagpanglingla. Mao kini sitwasyon sa politika sa siyudad sa Sugbo karon.

Gigamit ni Mayor Tomas Osmeña ang iyang gahum ug posisyon aron makapabor sa eleksiyon sa barangay ang iyang mga alyado nga pangulo sa BMO (Barangay Mayor’s Office).

Nagpakatap sila og leaflets dalang hulga nga “siya gihapo’y mayor” ug andam kuno siyang moatiman sa mga barangay. Pananglit usa, o duha sa iyang mga kaso nga nag-ung-ong karon sa Malacañang modis-og ug masuspenso siya, kinsa may moatiman sa iyang mga BMO nga makadaog? Luoy na kaayo ang barangay nga iyang alyado?

Daghan man og kaso si Tomas nga giimbestigar karon sa Malacañang. Ang iyang pangangkon nga amigo sila si Presidente Duterte kutob ra usab sa pangangkon kay sa matag anhi ni Digong sa Sugbo, wala man gyud siya makasulod sa sirkulo sa presidente ug ni special assistant to the president Bong Go.

Hinuon, ang grupo ni Bise Mayor Edgardo Labella ang nakasulod sa sirkulo ni Digong.

Gitayming ang pagpang-release sa cash assistance sa mga senior citizen nga nagsingabot ang eleksiyon sa barangay. Naa pa gyu’y mga estorya nga ang DOLE-7 nanghatag og livelihood assistance nga tag-P5,000 apan gipatunga aron daghan ang mahatagan.

Nagpadalidali og publikar sa SWS survey nga kunohay taas og “trust rating” si Tomas. Dili ba kaha ni fake news? Sa maong survey, gipalutaw kunohay nga kadaghanan sa mga Sugboanon gusto og BRT.

Makaingon ko nga fake news kay dili ko motuo nga usahon pag-survey ang pagpasikat ni Tomas ug ang kagustohan kunohay sa mga Sugboanon sa BRT. Unya giapil sa survey nga kunohay si Mike Dino ug Kenneth Cobonpue nga mga kontrang Tomas, mga mugbo og rating.

Ang Malasakit Center gisakyan usab. Adunay mga post sa Facebook sa BMO ni Tomas sa Bulacao kuno, ID nga adunay letrato ni Juna Babatuan, Tomas, ug Bebot Abellanosa.

Programa sa Office of the Presidential Assistant for the Visayas ang Malasakit Center. Diha ko sa mga meeting niining maong proyektoha. Pero wala gyud ko makakita sa mga nawong anang Bebot, Tomas ug Babatuan. Busa kanang ID nga ilang gipakatap sa BOPK, mga peke na.

* * *

Gigamit ni Tomas ang taktika sa paglingla sa mga tawo nunot niining pag-defer sa measure paghatag og gahum sa mayor alang sa joint venture tali sa mga Gokongwei alang sa usa ka dakong negosyo sa Kawit Island.

Kon si Tomas ang pasultion, gibabagan sa grupo ni Labella ang proyekto.

Apan buot lang sa kampo ni Labella nga matan-aw ang kontrata kay para nila alkanse kaayo ang siyudad. Adunay mga kasabotan nga pabor sa negosyante. Pero nganong dali-dalion man ni Tomas ang konseho? Pila man gyu’y iya niining proyektoha?