EDITORYAL - Politika sa SRP

Gusto ni Cebu City Mayor Tomas Osmeña nga basolon sa katawhan ang mga oposisyon nga konsehal dinhi sa dakbayan tungod sa posibleng dili na madayon nga Kawit multi-billion project nga usa ka joint venture sa siyudad ug sa usa ka pribadong developer.

Makapila naman kini mahitabo nga duna’y mga gusto ang mayor nga wala matuman tungod sa pagbabag sa konseho, unya gusto niyang basolon sa mga tawo ang oposisyon? Matag ingon niini nga panghitabo, gusto ni Osmeña nga timan-an sa katawhan nga ang iyang mga plano gibabagan sa mga konsehal nga alyado sa oposisyon nga gihulagway niyang kontra sa kalamboan sa siyudad ug sa mga Sugboanon.

Makasabot man tingali ang katawhan nga isip oposisyon, tahas gyud nila nga babagan ang mga plano ug gusto sa administrasyon kon sa ilang tan-aw dili makaayo sa Sugbo ug sa katawhan. Nangandoy si Osmeña nga ma-develop ang kanhi Kawit Island nga kabahin na karon sa SRP aron daghan ang makatrabaho. Nindot kaayo nga plano kon matinuod.

Ang pagbabag sa mga konsehal sa oposisyon may rason, dili lang siguro tungod sa politika. Bisan pa man og may pagduda nga “party decision” ang ilang gihimo sa wala pag-uyon sa resolusyon nga maghatag og pagtugot ni Osmeña nga mopirma og kontrata uban sa developer. Kini tungod kay duna sila’y nakita nga mga deperensya nga matud sa oposisyon maalkanse og dakong kantidad ang siyudad kon uyonan nila ang kontrata nga buot sudlan sa mayor.

Angay’ng tun-an pag-usab ang mga lagda sa kontrata kay kon wala pa’y natan-awan ang mga oposisyon nga konsehal nga mabentahaan ang siyudad, dili tingali nila kini supakon. Kon ang tumong mao ang pag-ugmad sa SRP aron makamugna kini og daghang trabaho, maayong lingkoran kini pagbalik sa mga sakop sa executive ug legislative departments aron nga maplantsa ang angay’ng usbon diha sa kontrata ug mapadayon ang proyekto.