Ilegal nga sugal dili masumpo

Diha nga miulbo ang sunog sa Barangay Ermita, daw panon sa mga agukoy nga naglumba pagpanggawas sa ilang tagsatagsa ka lungag ang mga lumolupyo aron makaikyas sa nagdilaab nga kamatayon.

Kutob sa unsa’y gimahal nilang butang, basta madaog lang sa tawhanong kusog, ilang gidala ug gipundok didto sa lugar nga dili na makab-ot sa kayo.

May mga abtik og mata nga nakakita nga dili lang appliances sa panimalay ang gipangyayongan, kon dili, hasta mga video karera, moli-moli ug uban pa nga kagamitan sa mga de-makinang ilegal nga sugal.

Ang pangutana mao, nganong wala man kaha sila mahadlok sa pagdala niining mga ebidensya nga magtug-an nga diha mismo sa Ermita may mga masinupakon pa gyud diay sa balaod nga nagpadayon pagnegosyo og illegal gambling machines?

May mga polis kaha nga miadto didto? Duda ko, wala! Kay kon duna pa, nasikop na unta dihadiha kadtong mga anino nga mihiklin sa ilang illegal gambling machines. Siyaro na man sab, gikan sa barangay tanod, konsehal ug barangay kapitan wa gyud kamatikod niini? May mga kongresista nga nagplanong mopanday’g balaod nga ang kanhi masyaw ug karon, suwertes na, ug uban pa nga matang sa ilegal nga sugal, himoon na lang legal aron duna kuno’y makolektang dinagkong buhis ang gobiyerno.

Ang pangutana, sigurado ba nga sa paghimo nga legal sa ilegal nga sugal, hingpit ba nga mawala ang tanang pasugalang ilegal? Naa na ta’y daghang Casino sa Pilipinas. Naa pud ta’y PCSO. Anaa sab ta’y mga bulangan.

Pulos very legal ni, ug nganong duna pa man gyuy ilegal nga mosingit? Diha’y naghantak nga pag-abot sa polis mialibwag pagpanagan ang mga sugarol. Ang natapok nga dinagkong taya sa yuta, gibiyaan lang sa mga tonto.

Aw, pwerteng lipaya sa polis. Unya kay wala na man siya’y dakponong tawo, ang naglaundok nga kuwarta mao na la’y iyang gisikop!

Usa ka retiradong polis mipaambit sa iyang kaguwatsinanggo kaniadto. Kon wa kuno siya’y kuwarta, moadto lang siya’g tigbakay. Mobarug lang siya nga binaklid ang mga kamot, taudtaod may moduol ug butangan og pinilong kuwarta ang binukhad niyang palad. Mao ni ang rason nganong dili gyud masumpo ang mga ilegal nga sugal kay ang problema wala sa mga dakponon, kon dili, naa sa mga mananakop!